I wakken ad tuɣal talast i twaɣiwin n yiberdan i d-yesseglan macci drus n yimeɛḍar d wid yemmuten, xedmen imsulta n Bechloul i lmend n wass agraɣlan n umeɛdur yiwet n lḥemla n useɛlem ɣef tmental d wayen i as-d-gellunt twaɣiwin n yiberdan. D aɣerbaz amezwaru Slimane Cherarak ideg d-tella temlilit gar yimsulta d yinelmaden n uswir wis 4 d wis 5. Da, lyuṭna A. Banoun, yeṭṭfen amekkan n uselmad, yessaweḍ deg yiwet n temsirt ad yessiweḍ izen imi tuget n warrac wwin-d imedyaten i walan akka deg unnar, ama seg wid yessufɣen tarwiḥt neɣ wid yeqqimen d imeɛḍar teɣzi n tudert-nsen imerra. Iwulem ad d-nesmekti d akken sin wagguren uqbel aya, tella-d deg uɣerbaz-agi yiwet n temlilit akked yinelmaden n uswir amenzu anda i d-tella yiwet n temsirt ɣef waya. D acu kan, sin n yimalasen umbeɛd, yella-d akka uḍfar sɣur yimsulta ufuɣ d unekcum n yinelmaden-a anda i d-iban mazal aṭas deg-sen teddun deg ubrid, ttun belli yezmer ad qablen tawaɣit. D ayen i yeǧǧan A.Banoun yuɣal kan s aɣerbaz-a anda d-yessemlal azal n 50 n yinelmaden i wakken ad iressi aɣawas-a n uḥareb n twaɣiwin n yiberdan. D ayen i t-yeǧǧan ad aɣ-d-yini « segmi akka i nwala d akken inelmaden-a, tettun iman-nsen, teddun deg ubrid gar tkeryas, nfures tagnit n wass agraɣlan n umeɛḍur i wakken ad nemmeslay yid-sen ɣef wayen i d-tettaǧǧa taluft-a deg umdan. Am wakken daɣ i lwaǧeb fell-aɣ, ad nesseḥbiber ɣef yigerdan-a imi, am wakken i t-ẓram, axeddim-nneɣ yebna ɣef uḥareb ɣef umdan d wayen i yekseb».
M. Smail