iḍelli n lḥed 25 meɣres 2018, ɣef 10h00 n ssbeḥ, i tebda s wudem unṣib tezrigt tis tesɛa n tfaska “Taɣuri s wurar”, deg temkerḍit tagejdant n tɣuri taɣerfant n Tizi Uzzu.
D leqdic i d-thegga Tenmehla n yidles ɣef teɣzi n ddurt, imi yebda iḍelli n lḥed 25 deg meɣres, ad tekfu ass n ssebt 31 deg waggur-agi n meɣres. Ad d-tili tezrigt-agi deg 5 n yimukan n yidles d tmussni deg wakal n lwilaya n Tizi Uzzu yecban: Axxam n yidles Mulud Mɛemmeri d Tneḍfart-is n Azazga, Tamkerḍit tagejdant n tɣuri taɣerfant, Axxam n umezgun amniḍan Kateb Yacine, ulmis adelsan Matoub Lounes n Ain El Hammam akked kra n tamimiwin n lwilaya. Yettwahegga-d yiwen wahil d amerkanti, ideg ara d-tili rreḥba n yidlisen (timsikniyin sɣur 20 n tezrigin, d yisenza s yibuddan sɣur waṭas n yimura), ama deg Uxxam n yidles ama deg Tneḍfart-is n Azazga neɣ deg Temkerḍit tagejdant n tɣuri taɣerfant, seg 9h n ssbeḥ alamma d 16h n tmeddit ɣef teɣzi n ddurt, am wakken daɣen ara d-ilin waṭas n yisaragen akked yisikwan ɣef teɣzi n 7 wussan. Ma d ahil n ttiɛad-agi idelsan uzzig n yigerdan, ad d-yili d amerkanti. Ad nezwir s yisikwan n temkerḍt n tɣuri, ad d-ilin ddeqs n yiskiwan gar-asen: Urraren n usegmi, asikew n tutlayt tamaziɣt, win n tira d tzabut, win n usuneɣ d win tulsa n tmacahut…atg. Ma d wid n Uxxam n yidles d tneḍfart-is n Azazga, ad d-ilin akka; win n tifinaɣ, win n tmaziɣt, win n usuneɣ, n tmucuha, asikew n yimuhal n ufus…atg. Yerna yal asikew yesɛa timsizzelt, ideg ara d-ifriren tlata n yimsizwaren. Am wakken daɣen ara d-tili temsizzelt tameqqrant, deg Temkerḍit n tɣuri, ass n larebɛa akked lǧemɛa i d-iteddun. Timsizwert-agi, ad tili ɣef yimuhal n ufus. Ma d tin n wass n lexmis 29 meɣres, ad tili ɣef sin-agi ixeddimen akked tsuqqilt seg tefransist ɣer teqbaylit n yiwen uḥric seg yiwen n wungalen n Mulud Mɛemmeri. Wayeḍ ad d-yili azekka n ttlata, d agzul n wungal “Le fils du pauvre” n Mulud Ferɛun. Ma d rrebɛa n yisaragen yetturaǧun ad d-ilin deg wussan-agi i d-iteddun, d wigi: sin imezwura, ad d-ilin sɣur umaru d uneɣmas ilemẓi Anis Ben Tayeb, yiwen s usentel-agi “Amekkan n umennay deg tmacahut taqbaylit” ad d-yili ass-agi ɣef 10h00 deg tzeqqa n yisaragen n uxxam n yidles. Wis sin, ad d-yili azekka n ttlata 26 meɣres 2018, s usentel-agi “Liɣ d ilemẓi yerna uriɣ adlis”, ddima sɣur Anis Ben Tayeb deg tzeqqa n yisaragen n uxxam n yidles. Wis tlata, ad d-yili ass n larebɛa 28 meɣres, sɣur yiwen imḍebber n laman n lwilaya ɣef tɣellist n yigerdan mgal yir asexdem n ttawil n Internet. Ma d wis rebɛa, ad d-yili azekka-in n lexmis 29 meɣres, sɣur Ali Ferɛun ara d-yawin awal ɣef wungal “Le fils du pauvre” n baba-s Mulud Ferɛun. Ma deg tzeqqa n ssinima, Ammas adelsan Matoub Lounes akked Uxxam n umezgun amniḍan Kateb yacine, yetturaǧu ad d-yili wahil meqqren n yisihren. Gar tceqqufin n umezgun, imseḍsa, aseḥḥar akked usenɛet n yisura, timeɣriwin n ccna…atg. Am wakken daɣen yetturaǧu, ad d-tili teɣlamt (caravane) n tmucuha n leqbayel ara d-iẓuren aṭas n tamiwin, sɣur tiddukkla tadelsant Ixulaf n Ǧerǧer n Tizi Uzzu. Mebla ma nettu tamkerḍit yettembiwilen (bibilobus), ara yerzun ɣer ddeqs n yimukan n lwilaya n Tizi Uzzu. Ad d-yili daɣen wahil n tuqribin, ara yebdun seg wass n ttlata 27 meɣres 2018, ara d-yilin deg tɣiwanin-agi: Tigzirt, Tizi Uzzu, At Dwala, Ililten…atg. Ass n ssebt 31 meɣres 2018, ad d-tili tesfugla n taggara deg Uxxam n yidles Lmulud At Mɛemmer, ideg ara ttunefken yigerdasen n uttekki i yimekkiyen deg tfaska-agi, d warrazen i warrac ara d-yifriren deg yal asikew d yal timsizzelt tameqqrant.
Ghani Amazigh