D uguren imeqqranen i d-ttmagaren wid yeznuzuyen aplastik, seld mi tekker taggara-a tegrawla deg ssuq n uzenz d tiɣin. Yal yiwen yettnadi amek ara yesselhu tikli n uxeddim-is i simmal irennu tuɛert, ladɣa i yilemẓiyen i d-yessufɣen timacinin s ttawilat n Ansej d Anem. Ugten nezzeh yilemẓiyen-a i yeddmen acqirrew ɣas ma ẓran ad ttwalasen deg ddin i yewwi-d ad yebdu uxelles-ines deg tfada i d-yettunefken. Aya dɣa iga-asen-d seg wakud yezrin timḍerrit seld mi yenqes umahil-nsen, ur ufin win ara yaɣen sselɛa-nsen s ssuma ara ten-iɛawnen, ur sɛin swayes ara aɣen tin n wid i tt-yeznuzuyen. Armi llan ttuḥettamen tikwal, ɣas xesren, ad zzenzen s terxes neɣ ad d-aɣen s leɣla akken ur ḥebbsen ara axeddim. D aɣilif i d-yesnernan tteqlaq i widak i iwalan imanen-nsen nṭerren, imi ḥsan ma ikemmel lḥal akka, ur ssawaḍen ad d-skecmen adrim swayes ara xellsen ddin-nsen iwumi i d-yettqarab lawan. Ula d urrif yekki deg-sen, qqaren-d nutni ur yelli llum fell-asen skud xeddmen akk ayen iwumi zemren. Maca, d imsaɣen i ulac, imi ula d luzinat timeqqranin, i yexḍan Ansej d Anem, jebbden seg tama-nniḍen. Nnig waya, aṭas i yettwalin ugur-nniḍen deg tegnit i d-yettsaḥen i menwala, ɣas ur yesɛi agerdas (diplôme), ad yexdem s ttawilat Ansej d Anem. Ad d-nesmekti kan d akken nnejmaɛen ussan iɛeddan deg Tizi Uzzu wat Ansej d Anem i wakken ad ḥudden ɣef yimanen-nsen, ad as-inin i udabu, ur zmiren ara ad xellsen ayen ideg ttusalasen skud ur ileḥḥu umahil akken ilaq, ad as-ssutren daɣen ad asen-yesmeḥ ddin-nni. « Ula dagi, di Bgayet, ilaq ad d-nenṭeq, ad neccekti i uwanek ɣef yir addad deg nella. Leɛtab nerwa-t, abaɣur ulac ». I d-tenna yiwet n tlemẓit i ixedmen Ansej.
Kaissa Khalifi