Seld kra n yisiharen n ccna deg Fransa d Marikan, iɣef i d-yenna unaẓur « ɛeddan di tegnatin igerrzen. Sanda ma nerra teččur tqaɛet », yettheggi uḥeddad n wawal Zedek Mouloud i yigalaten-nniḍen, deg Argenteuil ass n 28 yebrir akked Bilǧik kra n wussan ɣer sdat, send ad d-yuɣal ɣer tmurt deg unebdu. Ɣef tezlit-is taneggarut « Teqqleḍ d lɣerba a Tamurt », yenna-d Zedek Mouloud d akken tusa-d ad d-temmeslay ɣef wayen yettidir akud-a aneggaru. « D tidet, teqqen tezlit-a ɣer liḥala-w tamirant mya ɣef mya ». Ma ɣef taluft n uɣerbaz i d-yebder deg-s, yemmekta-d abeɛda unaẓur agrud aqbayli i ur neɣɣar taqbaylit-is si tazwara. « D ayen akken tfehmem merra iɣef i d-mmeslayeɣ. Mi ara yexser unagraw asegman, ur tesɛiḍ d acu ara tessirmeḍ d ayen yelhan ». Nger awal akked mmi-s n At Xelfun ɣer tezlit tamḥaddit d liḥala-s akka tura. Yenna-d ɣef usentel-a: « zemreɣ ad d-iniɣ tuqa akka tura tezlit tamḥaddit. Aṭas ur as-nefki azal, ddan kan s tezlit-nni tafessast, neɣ iɣesben. Ma d imawlan n tezlit tamḥaddit, msakit wa yemmut, wa yenfa, wa yekna ». Yettwali Zedek Mouloud mazal tesɛa amḍiq tezlit tamḥaddit meskud yis-s i d-ttwaḥellayen yizerfan, daɣen yessefk ad neṭṭef deg usirem. Ayen yeɛnan tameɣra n Argenteuil ass n 28 yebrir, iban-d mačči ḥaca tinna i t-yettraǧun deg Turuft. « Sɛiɣ yiwen n usihar n ccna deg Argenteuil deg 28 yebrir akked wayeḍ deg Bilǧik ». Ula di Tmurt, ad d-yuɣal bab n « Tidderwect-iw » anebdu-a i d-iteddu akken ad yemlil d wid i t-iḥemmlen. « Nhegga-d, ad nili di Buǧima, ass n 7 yunyu, di Tegzirt ass n 17 ɣuct ». Ma yella d tamiwin-nniḍen, yenna-d unaẓur ur tufiḍ anwa i asen-yessawlen. Asentel n TQ5, i d-sbedden kra n yizwawen deg Kanada ur t-nezgil ara, imi seld BRTV, tennerna-d Taqbaylit 5. Yenna-d Zedek Mouloud: « Nesra s waṭas i walɣagdud aẓayan. D ayen yelhan wayen akk ara d-yernun i teqbaylit ».
M. K.