Aḥric wis 5
Tezzi-as-d i Mm Yiγiγden s uεrur, ulint nettat d yessi-s-nni yessalayen iman-nsent, yettawin iεenqiqen-nsent deg yigenni si zzux d lfux γer tcaritdt, zzuγrren iεawdiwen, ğğant-as-d aḍu γer deffir, tḥulfa s yiman-is tmeγdurrt amzun isefferr-as uwtul… Akken i d-tufa tegra-d kan iman-is deg uxxam, tekker terza γef uẓekka n yemma-as, tebded s ddaw useklu, tettεenni, tessutur deg-s, teqqaṛ-as: “ Huzz iman-ik, mmḥiḥed ttxil-k ay aseklu, akken igenni ideg tella yemma, s wuraγ d lfeṭṭa ad iyi-d-yeglu!” Tecḍeḥ d mmi-s ugellid, iḍeggeṛ-as-d ufṛux-nni acebḥan tiqendyarr yettwaṛuccen s wurraγ d lfeṭṭa yerna-as-d tibacmaqin yettwaksun s leḥrir i yiḍarrenen-is. S uγiwel i telsa Mm Yiγiγden tunṭict-nni n at yigenwan. Teṭṭef abrid s tazla s axxam n tmeγra, ula d yambaba-s d yessi-s ur tt-εqilent ara, γillent akk d yelli-s n kra n ugellid n tmurt-nniḍen. Tugar Nulja Uteryel di ccbaḥa s tqenduṛt d terkasin-nni i d-telsa. Timcumin-nni ulac akk anta iwumi yenna wul-is deg-sent, ahat d Mm Yiγiγden tagi, ma yella kra n tin i tt-id-yemmektin imir-n, tγil ha-tt-an teẓẓel γef yiri n lkanun ulin-tt ilefḍan neγ tseffeḍ iγiγden i tεedsin. Akken ḍallent wallen n mmi-s ugellid fell-as, yebded wul-is kra n tegnit, lemmer i sen-yehwa i izan ad as-ččaṛen imi-s, tawwurt teldi, rgagin icekkaben-is urgaz akken yessefk. Yessekna aqeṛṛuy-is sdat-s almi d tikli ad yessuden iḍarren-is, yeẓẓel afus-is γurr-s, yessuter deg-s s teḍsa n wul d leḥdaqa ma yella yehwa-as ad tecḍeḥ akk yid-s. Segmi i d-as-rsen i ccḍeḥ deg sin yid-sen, iḥulfa urgaz s yiman-is amzun yekcem igenni wis sa ( 7 ), ur yezmir ara yakk ad as-iserreḥ akken ad yecḍeḥ d tayeḍ akken yella ngum ad tt-iwali mi akken yenṭṭeg am yifeṭṭiwej si ta γer ta…
Tettkemmil
Yerra-tt-id seg talmanit Essaid Ait Maamar