Ɣef leḥsab n wayen i d-wekkden yiɛeggalen n Useqqamu aɣerfan n tɣiwant n Lemɛatqa d uselway n Useqqamu aɣerfan Mass Laguel Lyes, ad tressi iman-is yiwet n terbaɛt n yiɣallen n usellek deg wussan i d-teddun deg tlemast n tɣiwant. Aya, ad d-yili i ubeddi mgal tiwaɣiyin yemgaraden, yettḥazen taɣiwant, ladɣa times n tẓegwa, yettḥazen yal tikkelt tamḍiqt-agi n Leqbayel.Yusa-d array-agi deg wussan iɛeddan, seld tiwaɣiyin n tmes n unebddu yezrin, anda tečča tmes ugar n 29 728 n tzemrin , ugar n 5 379 n ṭjur n lfakya-nniḍen, rnu ɣef waya aṭas n lexsarat -nniḍen. Ad tili terbaɛt-agi n yiɣallen n usellek deg wadag n unejmuɛ n wallalen d ttawilat yettabaɛen ɣer tɣiwant, simmal ad yettwabnu wadag i terbaɛt-agi deg yiseggasen i d-iteddun.
Ali Zalouk