Tger-d ussan iɛeddan, deg usebter-is n Facebook, tddukkla tadelsant Taɣerma Aburɣes tiɣri i tikkin deg umsizwer n tmedyazt, ara texdem i tikkelt tamezwarut. Tiddukkla-a i d-inecden merra imedyazen i ibennun awal s teqbaylit, tra ad tesfuggel ttiɛad n 20 yebrir i d-iteddun s waṭas n leqdicat yemgaraden, gar-asen amsizwer-agi amaynut ara yemmaggen deg taddart n Aburɣes, taɣiwant n Yilula Umalu, di Tizi Uzzu. Isalli-a, dɣa yessekcem tumert deg yimedyazen i iḥemmlen ad d-inin s usefru ayen ttxemmimen, ayen s ttḥulfun, ayen i ten-yessefraḥen d wayen i ten-yesseqraḥen. Yefka-asen daɣ tagnit ad d-sbeyynen, i tikkelt-nniḍen, tizemmar-nsen deg unnar n leqdic aseklan i ttcebbiḥen s yimru d tmenna. Ad d-nebder kan d akken tidukkla tadelsant Taɣerma Aburɣes mazal ur d-tefri ɣef wass ideg ara yettwaxdem umsizwer-a i yetturaǧun zun i wass n 21 deg wayyur-a n yebrir, ɣef wakken i d-nnan deg tiɣri-nsen. Mazal ur d-tefki daɣen yakk isallen i yeɛnan tikkin deg-s. Maca i wugar n yisallen, yezmer kra n win yebɣan ad yekki, ad yessiwel ɣer wuṭṭunen-a: 0696 86 34 46 neɣ 0558 75 06 63. Imekkiyen ara yilin deg ttiɛad-nni, ad d-ɣren anagar yiwen n usefru sdat yimferrǧen d yiɛeggalen n tesqamut n yinzurfa, gar-asen amaru-amedyaz Mass Ḥsen Merric. « Nessaram, ad d-rren waṭas n yimedyazen i tiɣri-nneɣ. Kra n win yekkin ɣur-neɣ, ad as-nessiwel, ad t-nesneɣmes ɣef wass n umsizwer akken ad d-yas, ad yeḥḍer ». I aɣ-d-yenna unmazul n uselway wis sin n tddukkla tadelsant Taɣerma Aburɣes.
Kaissa Khalifi