Am yal aseggas, isdawanen ur zgilen ara tagnit akken ad d-mmektin ilmeẓyen i iruḥen d iseflan deg Tefsut n yimaziɣen d Tefsut taberkant, ihi agezdu n tutlayt n teglizit n tesdawit n Mulud Mɛemmri, ihegga-d ddurt iɛeddan yiwen n wahil anda i d-llant timsikniyin, tugniwin n 20 yebrir 2001 , timsikniyin n yidlisen iqburen. Am wakken, daɣen, i d ihegga timezgunin sɣur ilmeẓyen akked yicewwiqen sɣur tarbaɛd n tlawin i d-icebḥen taqaɛet s teksiwin n leqbayel. Llan-d, diɣ, yisarragen. Amezwaru sɣur Mass Younes Adli, wis ssin sɣur Mass Abdenour Abdeslam, wayeḍ yewwi-d deg-s ameslay Mass Boukhrouf Belkacem. Ma d ass aneggaru, yella-d d tameɣra n taggara n wahil anda acennay Oulehlou, yefka tagnit i yilmeẓyen n tesdawit akken ad d-smektin tidyanin s cnawi , tidyanin i yeqqimen reṣṣant deg umezruy n yal yiwen .
Y.S.