Am wakken i yuɣen tannumi, imezdaɣ n twilayt n Tubiret ttraǧun s ccuq timlilit n teqbuct n Lezzayer ara d-yesselmilen tarbeɛt n yilmeẓyen n Leqbayel d tin n Belabbes.
Tumert, ytezwar-d mi akken JSK tḥella-d igemmaḍ igerrzen ama sdat n Lmediyya s tlata n yiswiyen neɣ ahat amɛadel sdat n CRB, ayen i tt-yeǧǧan ass-a tebɛed seg uɣelluy s aswir wis sin. Imi yiwen n yiswi yettwaḥella-d, tura udem yezzi ɣer teqbuct i wakken ad d-yuɣal usirem- nni n yiseggasen yezrin, mi tella JSK d tin yessemlalyen iqbayliyen imerra s yiwen n usuɣu : « Yerbeḥ neɣ yexser d gma-tneɣ… ». Ɣef waya, ama d ifurguten neɣ d lkiran, ttwaheggan i usiher-a anaddal ara yilin d tameɣra deg unnar n 5 yulyu deg tmaneɣt. Seg tama-nniḍen, aṭas akka n yilmeẓyen i nwala s yiselsa n terbaɛt-a d waṭas n yizumal ttwaɛelqen deg yiberdan d leḥyuḍ, i wakken ad d-beggnen lebɣi d leḥrara i izedɣen imezdaɣ ɣer uḥric n unaddal s umata d terbaɛt n JSK s ddemma.
M. Smail