Aseggas-a, asfugel s tefsut n yimaziɣen ibeddel udem ɣef yiseggasen yezrin. 38 n yiseggasen-aya segmi i d-ḍrant tedyanin i wayen iwumi neqqar 20 yebrir, asfugel yezga s tmesbaniyin, tikli deg yiberdan d yisaragen. Maca, aseggas-a, d ineggura-a i yellan s ṭṭaqqa di yal tamnaḍt, ama ɣur yiqbayliyen ama anda-nniḍen. Acimi ? Ɣef leḥsab n wayen i d-qqaren waṭas n yimeɣnasen, amennuɣ tura ɣef taluft n tmaziɣt, ilaq ad ibeddel abrid. Uqbel ad tili tutlayt n Masensen deg uɣerbaz d tesdawit, asuɣu d lawan-is. Tura akka, imi tamaziɣt tuɣal d tutlayt taɣelnawt tunṣibt deg tmendawt, yennayer d ass n lficṭa s wudem unṣib daɣ, asebded n tkadimit deg umecwar, amennuɣ iwulem ad yili s wuden-nniḍen, win n umeslay, n tikti d uskasi. Maca, ass-a, tamsalt iceɣben imeɣnasen d tin i nwala, i nesla deg waṭas n yisaragen ɣef temsalt n tkadimit. « win qqsen yizerman, yettaggad imraren », d awal i aɣ-d-nnan aṭas n yimdanen i d-nemmuger, imi ugaden ad d-teɣli teseqqamut-a gar « yir » yifassen, widen ur nesseḥbibir ara fell-as. Aṭas i yugaden ad d-taweḍ terbaɛt ara yessexsin tirgit n usirem i ttraǧun yimdanen. Deg yisaragen iwumi neḥḍer, awal yezzi s waṭas ɣer tira, ɣer usekkil ara tefren tkadimit, ulamma d win ur nwulem ara ad d-yili akk fell-as wawal, imi annar ibeggen-d s anda tewweḍ tura tira n tmaziɣt. Am wakken daɣ i d-yuɣal s ṭṭaqqa usteqsi yerzan tantala, imi ass-a aṭas i yetturajun seg tkadimit ad d-teffeɣ s yidlisen d yiwellihen ara yesdukklen tameslayt-a, ara tt-yeǧǧen d tanesbaɣurt s umgared n tantaliyin-is.
M. Smail