Aṭas n yiqeddicen i d-yettmendayen imdanen yal ass, ssaramen ad ten-frun deg teswiɛin izerben, war aɛeṭṭel. Tikwal yettuḥettam yiwen ad yezger asettum (distance) ibeɛden ɣef temnaḍt-is akken ad d-yeqḍu albaɛḍ n lecɣal, imi, am lɣaci n tamiwin n tuddar yemgaraden, ur yufi afran-nniḍen. Am umedya n kra n lekwaɣeḍ i d-yettmaggan seg tdayriwin d tiɣin n kra n tɣawsiwin yeɣlayen, am tkerrusin i yettnuzun deg yidigan ibeɛden ɣef kra n yimezdaɣ n twilayin, ladɣa imesdurar. Tikwal daɣen, ttilin-d lecɣal-nniḍen i iseɛɛu umdan, yezmer ad ten-id-yefru seg yimukan i as-iqerben neɣ ahat seg taddart-is anda yezdeɣ, maca ur yelli wamek skud ulac wid ilehhun d uḥric-nni n uxeddim, neɣ win yeddmen asenfar-is s wayen merra i d-yessutur. D ameslay ɣef taddart neɣ iɣrem (village) n Wat Tɛisiwt i d-yezgan deg tɣiwant n Ayt Smaɛel i ibeɛden s wazal n 70 n yikilumitren ɣef waɣir n Bgayet. Taddart-a ihi, txus aṭas deg ttawilat n tudert neɣ deg tilin n yidigan ansi yezmer umezdaɣ-is ad d-yefru aqeddic-is, imi ad naf deg-s anagar tiḥuna n yisafaren n tuččit, tid n yiceṭṭiḍen d tidak n kra n dduzan-nniḍen. Aya dɣa yettḥettim yal tikkelt imezdaɣ-is, ad ruḥen ɣer tamiwin yexḍan tayla-nsen, am Tregragt d Burǧ Mira akken ad d-frun syinna ayen bɣan. D ayen i asen-yesruḥuyen ugar n wakud, i asen-irennun daɣ asḥissef ɣef waddad n taddart-nsen i werɛad ibeddel ɣer wayen ara ten-yesferḥen, i ttwalin qrib yeqqim am zik ɣas ayyuren d yiseggasen ttɛeddayen.« Lemmer ufiɣ yal tanezzayt, ad d-aɣeɣ aɣmis send ad ruḥeɣ ɣer umahil akken ad ceɣbeɣ deg tɣuri, maca ulac win i ten-yesnuzuyen di taddart-nneɣ ». I d-yenna yiwen n umezdaɣ n Wat Tɛisiwt. Ad d-nesmekti kan d akken ula d asibir (cyber) ur yelli deg Wat Tɛisiwt. Ternuḍ-as lexsasat-nniḍen n tudert i ssaramen yimezdaɣ n yiɣrem-a ad nuḥen sya ɣer sdat.
Kaissa Khalifi