Aḥric wis 9
Azekka-nni, yekker-d mmi-s n ugellid, yuγ lewhi n ubrid-nni tettaṭaf Mm Yiγiγden yal mi ara as-terwel. Yewweḍ γer sdat uzrib yellan deffir n uxxam-nsen, yemlal-d baba-s d amezwaru, yenna-as: ‘’Ḥala tin i umi ad tezg tarkast-agi n wuraγ ara yuγalen d tameṭṭut-iw “. Nnecṛaḥen wulawen n terbibin n baba-s n Mm Yiγiγden akken yessefk, acku γur-sent tiqejjirrin gerrzent. Tameqqrant deg-sent, tewwi tarkast-nni γer texxamt-is, tedda yid-s yemma-s, maca ur as-d-tezgi ara, ur tezmir ara ad tessekcem tifednan-is timeqqṛanin. Teffka-as yemma-s ajenwi, tenna-as: ‘’Ax gzem tifednan-im! Mer ad tuγaleḍ d tameṭṭut n mmi-s n ugellid, maεεac ad telḥuḍ γef uḍarr. Taqcict, tuγ awal n yemma-s, tegzem tifednan-is, tessekcem aḍar-is di tarkast, tessebleε teqṛeḥ, teffeγ-d γer mmi-s n ugellid. Yessuli-tt s ufella n teεrurt uεewdiw-is, yesγam-itt sdat-s, yewwitt yid-s ad tt-yer d tameṭṭut-is. Yesεedda-ten uεessas sdat n uẓekka n yemma-s n Mm Yiγiγden, qqimen sin yitbiren γef tcebbubt n useklu-nni n tjujtin, akken wwḍen γer sdat-nsen, ccnan-asen-d tizlitt-agi:
“ Tarkast teččur d idammen, tamnayt-agi ur tettneḥcam.
Ihi tislit iwulmen, d tin i n-teğğam deg axxam“.
Iḍal mmi-s n ugellid γer tarkast-nni, iwala ttfeggiḍen seg-s idammen, yebren aεewdiw-is, yerra-tt s axxam, yenna-asen: ‘’Ala, mačči d tagi i d tislit i d yi-iwulmen, yessefk ad tqis uletma-s tarkast-agi’’. Tekcem γer texxamt, tessekcem tifednan-is war uguren di tarkast, maca agerz-is yegguma ad yekcem. Tefka-yas yemma-s ajenwi, tenna-as: ‘’Ax gzem agerz-im! Ma tuγaleḍ d tameṭṭut n mmi-s ugellid, maεεac ad telḥuḍ akk γef uḍar’’. Tuγ awal n yemma-s, tessekcem aḍarr-is di tarkast s timdeḥḥest, tessebleε teqṛeḥ am ultema-s, teffeγ-d γer mmi-s ugellid… Tettkemmil
Yerra-tt-id seg talmanit Essaid Ait Maamar