Imezdaɣ n tɣiwant n Ait Aissa Mimoun, ɣelqen ddur-agi yezrin Aseqqamu n tkabbanit tazzayrit n waman ADE. Yella-d uɣlaq-agi, mebɛed mi yurǧan yimezdaɣ-agi akken tbeddel tegnit, acu kan ur d-yelli, dɣa ɛeddan ɣer tigawt-agi n ubleɛ-ines.
Xedmen annect-agi, i wakken ad d-beggnen lxiḍ-nsen ɣef liḥala i ttidiren, imi ɛeddan ddeqs n wussan ur d-uɣalen ara waman. Imezdaɣ n taddart n Ighil Bouchene, s wuzzig, ctaqen, ad wallin taqqudirt n waman tettuddum-d seg tbarninin n yixxamen-nsen, yerna deg tallit n tefsut. Imi ɣef leḥsab-nsen d yir afraq n waman i yellan mačči d lexṣaṣ i xuṣṣen. Rnu ɣer waya, yir asexdem n waman sɣur yimezdaɣ n tuddar yellan rrif n ubrid, imi sefsadent s waṭas aman, ma d nutni ctaqen-ten ula i tissit. Tasebḥit n wass-nni n ttlata 24 yebrir 2018, nejmaɛen yiɛeggalen n tesqamut n taddart akked yimezdaɣ n taddart-agi sdat n Useqqamu n tkebbanit-agi, dɣa gezmen-tt deg rray. Syin akin, yella-d uɣlaq n tkebbanit tazzayrit i waman “ADE”. Ma si tama n yimḍebbren n tkebbanit-agi, sefhamen-d tamsalt-agi n lexṣaṣ n waman deg tɣiwant-agi s tmuɣli-nniḍen. Imi ɣef wakken i t-id-nnan, deg tazwara xuṣṣen waman deg wuggug n Teksebt akked yinuyen n waman, tis snat azal n 40% seg waman i d-yettruḥen ɣer tɣiwant-agi, ttruḥen deg yissafen, imi tiregwa neɣ iteyyuten i d-yettawin aman ɛyan acḥal-aya. Yenna-aɣ-d yiwen gar yimezdaɣ n taddart-agi: «Mačči d lmuḥal i d awen-d-nessuter, neɣ d aman 24h/24h neɣ ahat 7j/7j, maca nebɣa kan ad nesԑu aman am nekni am tudrin-nniḍen, daya kan i nebɣa a wid teԑna temsalt-a. Ur ilaq ara, yiwen ad yettɛemmir isitiren d lebyur i wakken ur tettxaṣan ara deg unebdu, wayeḍ ur ten-yerwi ara deg tefsut annef-as tura deg unebdu». Ugur n waman tettidir-it tɣiwant-agi n Ait Aissa Mimoun deg yiseggasen-agi ineggura, maca kra ttwalin belli mačči d aman ur d-neɣli ara s xilla neɣ d lexsas i xuṣṣen deg yigelmimen akked yisaffen, maca d afraq i ferqen ur nelli ara deg umkan-is. Ma d wiyaḍ, ttafen-d tisebbiwin s wayen yellan d axeddim-nsen, acu kan fkan afus deg-s.
Adaoun Abdelghani