Ass-nni n lexmis 26 yebrir 2018, i d-yezzi useggas ɣef tmettant n ucennay ameqqran Azeddine Berkouk, i yewḍen leɛfu Rebbi deg useggas iɛeddan. Ula ma yezri useggas ɣef lmut-is, maca imezdaɣ n lwilaya n Bgayet d wid n Aokas, ur tettun ara. Ass-nni n lǧemɛa 27 deg waggur-agi n yebrir ideg nella, tuɣal-as tejmilt meqqren deg Walmas adelsan Rahmani Slimane n tɣiwant n Aokas, i lmend n useggas ɣef tmettant-is. D tasfugla i d-ihegga Uzday adelsan n Uwqas, anida i d-tella tmeɣra n ccna sɣur yimeddukkal-is inaẓuren akked yicennayen-nniḍen yecban Chekkal Aziz, Lahlou Kamel, Redjradj El Ghani, Mouzaoui Mouloud, Bellouz Mokhtar, Nadya akked ugraw Imuras d wiyaḍ-nniḍen. Am wakken diɣen i d-llant tnagiyin ɣef tudert d yimuhal n ufennan-agi, sɣur imeddukkal-is ifennanen. Llant-d diɣ temsikniyin n ttsawer-is akked yimagraden n tɣamsa yettwarun fell-as.Ɣer taggara, ad d-nesmekti kan belli, uɣalent-as snat n tejmilin deg useggas iɛeddan. Tamezwarut, d tinna i d as-yexdem Uzday adelsan n Uwqas, kra kan wussan deffir tamettant-is. Ma d tis snat, d tinna i d as-terra Tddukkla n yimedyazen d yimura n lwilaya n Bgayet, i d-yellan i lmend n rebɛinyum-is (40) wussan deffir lmut-is.
Ghani Amazigh