Sendiḍelli n ssebt 05 deg maggu 2018, deg taddart n Yimalusen yellan deg tɣiwant n Tmizar i yettaɛen ɣer ladayra n Wagennun, i xedmen tameɣra n yifeki. D tazrigt tis setta ideg ttekkan ddeqs n yifellaḥen d yimzikniyen n lwilaya n Tizi Uzzu. D leqdic adelsan i d-heggan waṭas n yimsuddsen gar-asen: Tasqamut n taddart-agi n Yimalusen, Asqamu aɣerfan aɣiwan n Timizar d win n Tizi Uzzu, Asqamu aɣerfan n lwilaya n Tizi Uzzu, Tanmehla n yidles n temdint n Tizi Uzzu, Taxxamt n tẓuri d tin tfellaḥt n temdint-agi dima, s tallalt n waṭas n yimɛiwnen yecban: Soummam, Ramdy, Tifra Lait, Danoune, Tassili…atg. Tazrigt-agi tis seddiset, gan-tt d tajmilt i sin n yifellaḥen meqqren deg taddart-agi, wagi d Mass Iamrache Akli akked Achili Said. I yellan yettwasen s urebbi n lmal ameqqran d uyfeki n tfunast d wayen i d-ittekken seg-s. Ma d ahil i yettwaxdamen ɣef teɣzi n wass-nni n sem iɛeddan, tasebḥit n wass ɣef 9h00 n ssbaḥ, yella-d usersi n tmeqqunt n Yijeǧǧigen ɣef yismawen n 26 n yimeɣrasen yellan deg usebdad n taddart-agi, yesɛan azal deg tegrawla tazzayrit u deg umezruy n tmurt n leqbayel. Ma ɣef 9h30, tella-d tulya tunsibt, d uɛeddi ɣef yimḍiqen n yimsikniyen. Syin ɣef 10h00, yella-d umeslay sɣur yimsuddsen-agi n leqdic-agi. Yella-d diɣ yiwen n usarag i d-yewwin awal ɣef wayen akk i icudden ɣer ttrebga n testan, syin ɣer-s d lwaɛda i d-yellan deg uɣerbaz amezwaru n taddart-agi.
Ma deg tmeddit n wass, llant-d temsizliyin-agi; tin n tfunast yelhan, tin n tgenduzt yelhan, tin n taɣaḍt d tixsi yelhan, akked tin n lkuri azedgan. Tella-d diɣ tukci n yigerdasen n uttekki d usebɣes i yimsikniyen i d-yerzan s waṭas n tamiwin ɣer tlemmast n taddart-agi n Yimalusen. Am wakken, llan yimzikniyen ixeddmen timsikent n yifeki d wayen i icudden ɣur-s.
A. A