Am yal tikkelt, yettheggi-d Ugraw adelsan Mouloud Feraoun n Uɣernaz unnig ENSB n Buzariɛa leqdicat i yerzan ɣer yidles amaziɣ akked tẓuri-is. Tikkelt-a, suddsen-d yiɛeggalen-is, i lmend n umulli-is wis 10, yiwet n temsizzelt n tmedyazt ifazen. D tajmilt i umaru ameqqran Mulud Farɛun. Ihi, yal yiwen i yessazzalen imeslayen, i yessefruyen, yezmer ad ijerred iman-is deg temsizzelt-a. Acu kan, yewwi-d fell-as ad-asen yazen sin n yisefra i yettwarun s tmaziɣt ɣer tensa-nsen n Facebook ( club culturel : Mouloud Feraoun ensb ). Win ara i ttekkin, ad yettwasenqed ɣef tira akked ususru n usefru-s . Ad tili temsizzelt di tzeqqa n Mulud Ferɛun deg tesdawit n Buzariɛa, ass n 15 deg maggu 2018. Mi i d-nesteqsa yiwen seg yiɛeggalen n ugraw-a, yenna-d : ‘’Nekni d inelmaen deg tesdawit-a n Buzariɛa, tikkelt-a nextar akken ad-as nerr tajmilt-a i Mulud Ferɛun. Ma d leqdic-a, ɛawnen-aɣ deg-s kra n yiselmaden. Am wakken yella daɣen useqqamu unnig n timmuzɣa, ɣef uqerru-s Mass El Hechemi Assad akked Mass Bilek . Yerna yenna-d d akken mmi-s n Mulud Ferɛun ad yili d inebgi n lḥerma di temsizzelt-a.
Ahil i d-yettwaheggan
I wass-agi n letnayen 14 meɣres 2018, yella-d usarag n Ali Ferɛun (mmi-s n Mulud Ferɛun) i d-imeslayen ɣef tira d umecwar n yiwet gar tgejda n tsekla tazzayrit neɣ ɛad tamaḍlant maḍi. Tella-d diɣ temsikent meqqren ɣef tudert d wayen i d-yeǧǧa Mulud Ferɛun, tella daɣen temsikent-nniḍen n waṭas n tɣawsiwin timaziɣin. Ad d-tili diɣ ɣef teɣzi n wass-a, turart n tlata n tmezgunin s teqbaylit. Yiwet deg-sent d iɛeggalen n ugraw-agi ara tt-id-yuraren, ma d snat-nni-nniḍen d tirza i d-rzan seg At Yeḥya Mussa akked Mɛatqa. Ma i uzekka n ttlata, yetturaǧu, ad tili timsizzelt n tmedyazt deg tezrigt-is tis kraḍet (03). D timsizzelt ara d-yilin deg Uɣerbaz unnig n yiselmaden (ENSB) n Bouzareah di Lezzayer Tamaneɣt. D timsizwzert yellin tiwwura-s i imedyazen merra, i yettfeṣilen awal s tutlayt n tmaziɣt. Ma ɣef tegnatin n temsizwert-agi, yenna Mass Amrar Ṣufyan: “Yal amedyaz ad d-iɣer sin n yisefra s tmaziɣt u ad ten-yefk ttwarun s uselkim i tesqamut n ufran. Ad yettwaḥsab ɣef snat n tɣawsiwin kan, tamezwarut d tira, imi ilaq ad iqader ilugan n tira n tmaziɣt. Tis snat d udem swayes ara yessusru neɣ ara d-iɣer isefra-nni-ines”. Ma ɣef yiswi n temsizzelt-agi, ikemmel yenna-d: “D tagnit i yimedyazen-agi imeẓyanen, ideg ara myagaren d yimedyazen imeqqranen n teqbaylit, i wakken ad ten-welhen u ten-ɛiwen i wakken ad kemmlen ɣer sdat”. Yetturaǧu ad ttekkin deg-s ddeqs n yimedyazen, ara d-yerzun seg waṭas n yiɣerbazen n lwilaya n Tizi Uzzu, i wakken ad myeḥezwaren ɣef tlata-nni n yimeḍqan imenza.
S.Y./A.A.