Ssebt-agi deffir-nneɣ, 12 deg waggur-a n maggu ideg nella, ɣef 14h00 n tmeddit, tella-d temlilit taseklant s tewsit n “Café Littéraire” deg Wammas adelsan Ferḥat Remḍan n Buzgan deg lwilaya n Tizi Uzzu. D timlilit ideg i d-temmeslay tmarut d tneggalt akked tselmadt n tefransist Massa Hadjira Oulbachir, i d-yewwin awal s telqayt ɣef udlis-ines aneggaru iwumi tga isem-agi “Les genêts de l’Amour” neɣ “Uzzu n Tayri” i d-yeffɣen deg wussan-agi yezrin ɣer tezrigin Koukou. Adlis-agi d tazeffant s uẓawan, yettwaru s snat n tutlayin-a: tamaziɣt akked tefransist. Tewwi-d awal daɣen ɣef tira n udlis-agi-ines, acimi d wamek i t-tura. Temmeslay-d daɣen ɣef tirmit-is deg tira s umata, di tmedyazt akked umezgun s wuzzig. Tesmekta-d I yid I d-yusan ɣer din belli adlis-agi, yella d tamezgunt. Syin akkin turart-itt terbaɛt n umezgun n Uxxam umezgun amniḍan n Bgayet seg useggas n 2007. Ma d tura, tessuffeɣ-itt-id d adlis wis sin, mebɛed winn-a n tmedyazt “Tirga n tmes”. Texdem-d diɣ agzul ameẓzyan s teqbaylit i udlis-agi-ines aneggaru. Ma ɣer taggara, terra-d ɣef yisteqsiyen i d as-yettunefken. Ad d-nesmekti imeɣriyen-nneɣ, belli d tiddukkla tadelsant “Tiɛwinin” n Buzgan i d-yettheggin timliliyin-agi n tsekla yal ass n ssebt. Aṭas n yimura d yimnadiyen yettwassnen i d-yefkan isaragen-nsen deg wammas adelsan Ferḥat Remḍan n Buzgan, d leqdic. Nessaram ad idum leqdic i lebda, i lmend n wayen i d-yettawi d abaɣur n tmussni d ubeddel n tikta. Ad d-nesmekti daɣen belli, Hadjira Oulbachir d tamedyazt ifazen, texdem tidwilin deg umaṭṭaf wis sin. D tamarut n sin yidlisen. Am wakken daɣen i d-turar deg deqqes n yisura s teqbaylit. Tura diɣ deg uɣmis n La Dépêche de Kabylie, tselmed yakan tutlayt tafransist deg uɣerbaz azzayri. Aṭas n yicennayen d trebuyaɛ n ccna i yecnan isefra-s deg tezlatin, gar-asen; Menad, tarbeɛt Djurdjura…atg.
G. A.