Simmal ttnernin yisenfaren d lecɣal i d-yettilin deg tudert n umdan, i yettmaggan s tebɣest d lebɣi. Ladɣa s ttawilat, ama d wid n tedrimt neɣ n wayen-nniḍen, i yessefk ɣef win yegren deg kra ad ten-ikesseb d imezwara, imi iban ma ulac-iten ur yettwawwaḍ yiswi. Ma nemmeslay-d ɣef yiwen seg yisenfaren-a i d-yettlalen seg tikkelt ɣer tayeḍ, ad d-nebder tanemẓiḍt (pâtisserie) tansayant i yeldin ussan-a kan iɛeddan sdat n uɣerbaz amenzu di tama Lberj n Mira i d-yezgan deg tɣiwant n Tsexriwt i ibeɛden s wazal n 60 n yikilumitren ɣef waɣir n Bgayet. Tanemẓḍit-a tamaynut, ddment fell-as acqirrew snat n tsetmatin Tismaɛliyin I wakken ad d-sbeyynent tizemmar i tesɛa daɣen tmeṭṭut deg yiqeddicen yettwaxdamen di berra. Ad ilint ula d nutenti heggant s ucmummeḥ d leqder i usnubget n yimsaɣen ara yettekcamen ɣer dinna seg qeddac n yidigan yemgaraden, ama d ibeɛɛaden neɣ d widak iqerben. Ma nuɣal dɣa ɣer yisenfan n yingulen i yettnuzun deg tnemẓiḍt-nni tansayant, nezmer ad d-nini qqnen seg yiwet n tama ɣer yisem i as-yettunefken imi deg-s aṭas n yingulen insayanen akked d kra seg tgella taqburt i d-yettmaggan seg zik daxel n yixxamen n Yiqbayliyen, am umeḍluɛ d lesfenǧ. Maca seg tama-nniḍen, amsaɣ i yewwin ubrid ɣer dinna, ad yaf ula d isenfan n yingulen imaynuten i mačči aṭas n wakud segmi d-nnulfan, akked lqahwa i win i tt-yebɣan. Talalit n tnemẓiḍt-a tansayant, tessefreḥ nezzeh lɣaci i teɛna temsalt, abeɛda imezdaɣ i iqerben ɣer umkan ideg tnuḥ. Imi ɣas ahat niqal ttaɣen-d ingulen seg tnemẓiḍin-nniḍen n temnaḍt, tura mi d-tella tin i asen-iqerben ugar, iban d tinna ara ttekcamen i tiɣin.
Kaissa Khalifi