Mačči d ayen yessefraḥen i iḍerrun taggara-a deg lbanka n Xerraṭa, i sɛeddayen yakk imɣaren i tt-yettekɛmen akken ad d-frun lecɣal-nsen. Ma yella deg wakuden yezrin ttafen yimeqqranen deg leɛmer sshala deg tuddma n yimuren-nsen n tedrimt, i ttalasen yal ayyur neɣ yal kraḍ n wayyuren, seg lbanka n Xerraṭa, tiswiɛin-a tineggura yenneqlab-asen waddad. Aṭas n yimɣaren d temɣarin i yeccektayen s usḥissef ɣef wayen sɛeddayen merra daxel lbanka-nni, d tuɛert i d-ttmagaren iwakken ad awin kan ayla. Ɣef wawal i d-ḥekkun yimɣaren-a, nezmer ad d-nini uggten lḥif d lbaṭṭel i yettwaxdamen fell-asen, imi llan ttuḥettamen ad rǧun ugar n sebɛa n tseɛtin akken ad asen-d-telḥeq nnuba n tuṭṭfa n tedrimt. Aya iban yewɛer-asen nezzeh, ladɣa imi ur wwiḍen 10 n yikersiyen i yersen dinna i yiɣimi. Meḥsub ala imezwura i ikecmen ɣer lbanka-nni i yettafen tagnit n tɣimit fell-asen. Ma d widak-nniḍen terra-ten tmara ad ttraǧun s yibeddi, ad sebren i ɛeyyu. Nnig lexsas n ttawil n usraḥi i iḍurren imeqqranen-nni, ula d aɣilif n usɛeddi n nnwabi war leḥsabat n uzref ur ten-yezgil ara. Ɣas ma llan yimɣaren i yettaǧǧan iḍes, ttruḥun zik maḍi ad d-jebden tadrimt-nsen, ad uɣalen zik ɣer yixxamen, maca tikwal d wid yusan deffir-sen i sɛeddayen uqbel-nsen. Tikwal daɣen teffɣen-d mebla ma fran ccɣel i ten-yecqan, tteqqalen deg wussan-nniḍen. « Ruḥeɣ d lexmis tanezzayt ad d-ddmeɣ tadrimt-iw seg lbanka n Xerraṭa. Rwiɣ araǧu dinna, di taggara nnan-iyi-d ur iyi-tt-id-ttakken alama d ass n acer acku ɛeṭṭleɣ deg wawwaḍ. Mi uɣaleɣ d lḥedd ɣef lxemsa n tsebḥit, niqal ugin daɣen ad iyi-sɛeddin, wanag ur asen-susmeɣ tikkelt-nni. Qqimeɣ din armi d 14:sr akken i tt-id-wwiɣ ». I d-tenna yiwet n temɣart seg Ayt Smaɛel. Ɣef tnagiyin n wid i teɛna taluft, ssebba n lbaṭṭel-a yettmaggan ɣef yimɣaren deg lbanka n Xerraṭa, teqqen s waṭas ɣer uzwir i ttezwaren yiqeddacen-is deg wid yettruḥun ad sersen d tarusi idrimen, mačči ad d-awin. Ternuḍ-as itikiyen ur ttakken i widak i tt-yettekcamen iwakken ad yili lḥeqq, ad ibin d anwa ileḥqen send wayeḍ, d wanwa ara iɛeddin uqbel wayeḍ. Armi yewweḍ uɣilif ɣer yiniɣ d uṭebbeɛ gar yimɣaren, yal wa yebɣa ad zwiren deg-s. Dɣa tetteggra-d temḍerrit i temɣarin d wid yuḍnen.
K.K.