Ɣef wakken i d-wwin ssrabes n yisallen n rradyu tis 3, s yisem n yikewwacen n tmurt, tetteddu ad ternu ssuma n tbagiṭ deg yimalasen i d-iteddun. Ssebba n waya, ɣef wawal n wid ixeddmen deg taɣult, d lexsas n lfayda i d-mlalen taggara-a deg ṭṭjara-nsen. Nnan-d, xesren s tidet deg ulzuz s ssuma n 10 n yidinaren, i xedmen akka tura i yiwet n tɛekkazt (tabagiṭ). Imi yelha ad d-nerr awellih belli di Lezzayer tamaneɣt, llan yakan wid yessulin ssuma n tbagiṭ ɣer 15 n yidinaren. D acu kan, yugi-asen unabaḍ (lḥukuma) rray-a, rnu ɣer-s a-t-an iger kra seg-sen di ccraɛ. Aredmani, ma yeḍra-d terna di ssuma tbagiṭ, d ayen ara d-yawin ugar n unezgum d uttḥeyyer i umsaɣ, abeɛda tacriḥt n yiẓawaliyen, i yeccektayen yakan seg teɣlayt n tudert. Imi ar tura, ssuma n yisufar igejdanen n wučči, am uyefki, ssker d lxebz, mačči d wid iseɛden taxriṭ n waṭas n medden. Anef ɛad ma tettwasemres deg wannar tmernit-a deg ssuma n lxebz, deg wakuden i d-iteddun. « Ama terna ssuma n lxebz ɣer sdat neɣ uhu, ilaq ad tali tjernant taddayt n uxeddam akken ad yizmir ad iqabel tamɛict. Nṭerren ayendin tuget n yiɣermanen seg yir addad-nsen adamsan n temɛict-a ». I d-yenna yiwen n ubaba. Ɣef leḥsab n teɣbalut-nneɣ, ur yettqil uɣlif timernit-a di ssuma. Ulamma yergem i yixebbazen ad asen-d-yaf tifrat akken-nniḍen.
K. M.