Ala 9 n wussan i d aɣ-iferqen ɣef ukayad aneggaru n taggara n useggas aɣurbiz 2017-2018. D akayad i ttraǧun yisnawiyen s ccuq. Wa ixaq melmi ara iɛeddi, wa yeqqar : “Yewweḍ-d yakkan”, wayeḍ, wayeḍ… Ass n larebɛa-nniḍen ara yebdu ukayad-agi n BAC, ad yeddu ɣef teɣzi n 5 wussan, ad yekfu ass n 25 yunyu-agi ideg nella. Ma d ass n lǧemɛa 22 yunyu, ad d-yili d ass n usteɛfu. mMa d ssebt ad sɛeddin deg-s ulamma d taggara n ddurt. Uṭṭun n yimsizwiren yetturaǧun ad sɛeddin akayad-a n taggara n tesnawit, yewweḍ aseggas-agi ɣer 709.000 n yinelmaden deg 48 n lwilayt n tmurt. Deg lwilaya n Tizi Uzzu, tebda tenmehla n usegmi aheggi n ttawilat iwulmen i wakken ad tɛeddi tezrigt n useggas-agi deg tegnatin igerrzen. Dɣa deg wayen yerzan uṭṭunen n ukayad-agi n taggara n uswir n tesnawit BAC, ara d-yilin gar 20 ar 25 deg waggur n yunyu, yetturaǧu ad t-sɛeddin wazal n 19 019 n yisnawiyen, gar-asen 8 164 d arrac ma d 10 855 d tullas. Ad xedmen akyad-agi deg 70 n wulmisen n yikayaden. Uṭṭunen-agi, ṣṣuben cwiṭ ɣef useggas iɛeddan s wazal n 10,17%, imi ilindi azal 20 955 i t-isɛeddan. Ilaq ad d-nini belli wigi ijerden iman-nsen ɣer ukayad n BAC, llan deg-sen 12 918 d inelmaden iɣurbizen (yeqqaren deg tesnawit), llan wazal n 6 101 n yinelmaden imunan. Ma d ikayaden n waddal, yuɣ lḥal sεeddan-ten yinelmaden deg tesnawiyin-nsen am useggas iεeddan. Ma ɣef wayen yerzan, afran n yisental, tenna-d Massa Benghabrit deg wussan iɛeddan: ‘’Ula d aseggas-agi sin n yisental ara yilin s lxetyar, akud daɣen uzzig n yal tanga ad yeqqim akken yella’. Ma d igemmaḍ ineggura n ukayad-agi, ad d-ilin deg waggur n yulyu i d-iteddun.
Ghani Amazigh