Ur cubant ara tegnatin n ucqucceḍ d uzdam n tallit-a tid n tallit iɛeddan n wugar n 20 n yiseggasen ɣer deffir. Deg tɣiwant n Ayt Smaɛel, i yeggugen s wazal n 65 n yikilumitren ɣer Unẓul-asamar n waɣir n Bgayet, teggra-d taluft-a n uzdam d uḥebber ɣef yisɣaren i lmend n tegrest, d aɣbel ageɛmir n yimezdaɣ s umata. Aya imi ur yeshil ara ɣef yiwen ad yaf ulamma d taffa tamecṭuḥt di kra n yimeḍqan, swayes ara yesseḥmu kra n wussan, aniɛad ad yettkel ɣef lexla i unadi ɣef wayen yakk iwumi ara yesri teɣzi n ccetwa. Ɣas ma muggen tura waṭas n yiberdan yessawaḍen, iban-d simmal zerrin yiseggasen, simmal tettenqas teẓgi, tettruḥu tezzegzewt. « Mačči akka i d-necfa nekni s yimɣaren, imi zik ulac acu isehlen am uzdam, ama i uẓawali neɣ i umerkanti. Maca tura, ɣas d lawan-is, yuɣal ibeddel yakk uzdam, bedlent tegnatin. Di lexla, ulac isɣaren, tiẓegwa simmal ttenqasent ɣef waṭas n tsebbiwin. Si tama ttemɣurent neɣ ttwagzament ttjur, si tayeḍ yeṭṭuqqut tura lebni n yixxamen ula meqrub amadaɣ », i d-tenna yiwet n temɣart seg Ayt Smaɛel. Tga-d taluft-a ayendin d lḥir i yimezdaɣ n Ayt Smaɛel, abeɛda i wid ur nezmir si tama n tedrimt ad qablen asemmiḍ i d-iteddun s ttawil-nniḍen n useḥmu, am lmaẓuṭ, trisiti neɣ d lgaz. « Yal tagrest nettarew-d azdud ɣef wamek ara nqabel taswiɛt. Tura imi uqan annect-a yisɣaren n useḥmu, yeggra-yi-d kan ad d-aɣeɣ takamyunt teččur. Wamma lmaẓuṭ d ayen ur tezmireḍ ad tḥazeḍ meskud tɛedda ssuma n litra 20 n yidinaren », i d-yessufeɣ yiwen n ubabat. Ad d-nesmekti d akken seg waddad-a, ayendin d imezdaɣ n Ayt Smaɛel i yerran ɣer wallalen n useḥmu s lgaz. Ulamma ur yeṭṭixir umihi n uxnaq s umunuksid n ukarbun, fernen ayen ara yilin fessus ɣef texriḍt-nsen wala aḥebber ɣef umaẓuṭ.
M. K.