Deg Yiɣil Yezzan, neɣ Ɣilizan s yisem-is n tura, ɣef teɣzi n kraḍ n wussan, seg wass n ssebt ar letnayen yezrin, i d-tella temlilit n kra seg yimaswaḍen n tmaziɣt akked yiselmaden n umalu n tmurt (sin n yiselmaden i yal aɣir), yiwen d agensas n uɣerbaz amenzu, wayeḍ n uɣerbaz alemmas. Asentel iɣef yezzi wawal, d amek ara yili uselḥu d beṭṭu n wahil n tmaziɣt deg waɣiren-a, akked wamek ara d-yili usemres n udlis aɣurbiz, ladɣa ma neẓra d akken tuget n yinelmaden n temnaḍin-a d iɛerbawalen, ur ttmeslayen ara taqbaylit. Ma d idlisen-a, ttwasuffɣen-d i wid yessnen taqbaylit (yeɛni i yinelmaden n tmurt n Leqbayel). Ɣef waya i d-yewwi useqdec-ines s tefses, acku ahil d temsirin yellan daxel d tid yettwawelhen srid i win yessnen taqbaylit, ɛla ḥsab n Mass Bellil, d amaswaḍ n tama n Bgayet. Iselmaden-a daɣen, furṣen tagnit, mlan-d akk uguren d yiɛewwiqen i ttemlilin yal ass deg uxeddim-nsen, ama d azekker n kra n yinemhalen n uɣerbaz, ama d tinmehliwin n usedwal i iqemcen tiṭ ɣef yisennanen i yessan ddaw uselmed n tmaziɣit di tamiwin-a, imi ar tura mazal llan yinemhalen yettagin ad tettwaḥsab tezmilt n tmaziɣt deg yikayaden. D ayen i yeǧǧan iselmaden-a ad ssutren seg yimaswaḍen, ad gen aneqqis ɣer teɣlift n usedwel aɣelnaw, akken ara d-yili umuqel d uṣeggem d uselḥu ar sdat tutlayt tamaziɣt di temnaḍin tiɛerbawalin ma bɣan s tidet asewseɛ-ines deg yakk akal n tmurt.
Khaled. A