Tettuneḥsab tɣiwant n Mɛatqa gar tɣiwanin timenza deg lɣella n uzemmur. Aseggas-agi, txuṣ s waṭas lɣella-agi : d aseggas anda yella lexsas meqqren deg ɛecra (10) n yiseggasen ineggura. Sdat n lexsas-agi i d-yellan deg tmanaɣt n uzemmur, medlent tuget n tseyar tiwwura-nsent. Ɣef waya, dɣa, qqlen kra n yimɛelmen n tesyar, ttaɣend azemmur seg yigerzuyen-nniḍen, ula seg tmurt n Tunes, akken ad d-jemɛen amur meqqren n lɣella n zzit n uzemmur. Rnu ɣef lexsas n uzemmur, lehlak i iḥuzan amur ameqqren n yigran n uzemmur s ssebba n ubeɛɛuc n uzemmur (mouche d’olive). Dɣa ma nerra tamawt ɣer temḍiqt-agi n Mɛatqa, ad naf abeɛɛuc-agi n uzemmur, yeeseɣli-d yakk kra n uɛeqqa i iḥuza ɣer laqɛa. Ad txas w waṭas lɣella n zzit n uzemmur, aseggas-agi, dɣa tagnit i ifellaḥen n tɣiwant akken ad senzen ayen i d-yeggran seg useggas iɛeddan.
Ali Zlouk