Gar wayen i d-yettakken tamuɣli ɣef uɣerman, d addad n umḍiq ideg yettidir. Imi yal mi ara telhu twennaḍt, ad yelhu umdan-is, ma ulac ad d-yeḍru unemgal.
Tezga-d tɣiwant n Yiderginen ɣer Unẓul-asamar n waɣir n Bgayet, s tebɛed n wazal n 45 n yikilumitren fell-as. Tesɛa ugar n 15 n tuddar, ad d-nebder seg-sent Talemmast n Yiderginen, Tadergunt, Ayt Felkay, Ayt Ɛtiq, Seɛdan, Amrij, Ayt Ɛnan, Iɣẓer n Uftis, d tiyaḍ. Dɣa, ɣef wayen yerzan asizdeg d ucebbeḥ, a-t-an tettheggi tɣiwant n Yiderginen asseqleɛ n yiwen n wahil i taddart n Tlemmast n Yiderginen imi ur tettak ara akka tura udem yessefraḥen, ama i yimezdaɣ-is neɣ i yinebgawen. Akken i d-tewwi teɣbalut-nneɣ, i iqerben i Useqqamu aɣerfan aɣiwan n Yiderginen, lqidar n umelyar d sett-meyya n yisantimen i d-yettwaḥeggzen beddemma i usenfar-a amaynut n ureqqeɛ d usebhu n ubilaj-a. « Ur yettɛeṭṭil ara ad yebdu usenfar-a iwumu nekker, akken nessaram, i ureqqeɛ d ucebbeḥ n Tlemmast n Yiderginen, s wazal n umelyar d sett-meyya i nerra ɣer rrif i waya », i aɣ-d-yenna yiwen n unmazul n uselway n tɣiwant n Yiderginen. Si tama-nniḍen, iban-d d akken, berra i useggem n wudem n ubilaj, sɛan daɣen yimḍebbren n tɣiwant-a iswi-nniḍen; wa d tikkin deg umsizwer n taddart zeddigen sya ɣer sdat, ara d-yennulfun deg waɣir n Bgayet gar-aneɣ d kra n wakud. « Ugar n rray n wudem yelhan i Tlemmast n Yiderginen, nesɛa daɣen, ɣer sdat, tikti n tikkin deg umsizwer n taddart ifazzen di Bgayet», i d-yerna win i aɣ-d-yettmeslayen. Ad d-nesmekti d akken amsizwer-a n taddart zeddigen, swayes i d-iberreḥ yakan uselway n useqqamu aɣerfan awilay, Mass Mhenni Ḥadadu, ur yettɛeṭṭil ara ad yebdu.
M. K.