Mbaɛd 04 n wayyuren n leqraya, a-t-an wwḍen-d yimuras i ttraǧun yigerdan akken ad ffɣen ciṭ seg ɛeggu n yikayaden. Ad staɛfun akken ad heggin iman-nsen i tuɣalin i ukraḍyur wis sin. Ɛla ḥsab n imejjayen n tnefsit, agrud, ilaq-as ad ibeddel tarrayt-nni anda i yella imi mbaɛd lḥars n yikayaden, d lwajeb ɣef yimawlan akken ad ssufɣen dderya-nsen: ad uraren, ad nezhen deg yimukan yemxallafen. Ihi i lmend n yimuras n tegrest, thegga-d tddukkla tadelsant Tazazrayt n Tamda s lemɛawna n Uxxam n yilmeẓyen yiwen n wahil i warrac imectaḥ. Yedda wahil ass n sebt 22 deg duǧember 2018 anda i d-tella yiwet n temsizzelt n usuneɣ gar warrac akked yimahilen n yifassen. Tella, diɣ, di ttiɛad tarbaɛt n uẓawan anda i d-ccnan warrac imecṭaḥ. Deg wass wis sin, thegga-d tddukkla yiwen n umkan n wurar anda kksen warrac ɣef wulawen-nsen. Akken, daɣen, i d-tettwahegga yiwet n temsizzelt n ddabex uḍar di Mizrana i wid iḥemmlen addal. Ahilen yecban wigi, llan-d di merra lwilaya n Tizi Uzzu, imi d tagnit i yimawlan akken ad awin arraw-nsen ama ɣer yixxamen n yilmeẓyen n tɣiwanin-nsen, ama ɣer uxxam n yidles n lwilaya neɣ ɣer wammas n umzel n Tizi Uzzu.
Souhila Yamani