Agdud mebla idles am umdan mebla iles. Idles yebna ɣef tutlayt, amezruy d-teskla,… atg, syen ad-tlal tɣerma. Aṭas n yimusnawen irefden idles n tmurt almi yewweḍ ɣer tqacuct. Aṭas i yuran ɣef umezruy, uguren d iɣeblan n tmurt akked ccbaḥa-s. Gar yimura-agi yella yiwen gar tgejda n tsekla Tazzayrit wa d Mulud Ferεun. Mulud Ferεun d amaru azzayri s tutlayt tafransist, isem-is aḥeqqani Mulud At Caεban, ilul di tmurt n leqbayel ass n 8 di meɣres 1913 deg Tizi Hibel deg At Dwala. Yekcem ar uɣarbaz amenzu di Tewrirt Musa, syin ɣer le college n Tizi Wezzu di 1928. Rebεa n yiseggasen mbeεd, yuɣal ɣer uɣerbaz amagnu di Lezzayer tamanaɣt, tama n Buzarriεa. Asmi yesεa 19 n yiseggasen di leεmer-is, yeffeɣ-d s ugerdas n uselmed. Deg useggas n 1935 yesselmed di taddert-is Tizi Hibel. Yuɣal d anemhal n uɣerbaz n Tewrirt Musa, syin ɣer uɣerbaz n Larebεa n At Yiraten. Aseggas 1960 yuɣal d amaswaḍ. Mulud Ferεun yumen s wayen ixeddem, ticert s yettaru qeṭṭiεet, temsed i tira. Yettkel aṭas ɣef tira-s acku yessen amek izerreε awal. Mulud Ferεun yekker-d deg lḥif d llaẓ. Γas akken uguren n yal ass i d-yettaf zdat-s yessaweḍ yelmed deg uɣerbaz arumi, yelqeḍ-d tamusni zeddigen am waman, yugem-d di tala n tmusni swayes yessew tasekla Tazzayrit, isufeɣ-itt-id si ṭṭlam ɣer tafat. Tira n Ferεun tcud ɣer leεwayed tiqburin n tmurt n leqbayel. Aya yettbin-d deg ungal-is amezwaru “Mmi-s n ugellil”. Yura daɣen ungalen-nniḍen La terre et le sang, les chemins qui monten, Isefra n Si Moh Ou Mhend, d wiyaḍ. Deg-sen iban-d miḥyaf yellan gar sin n yigduden; agdud azzayri d imawlan n tmurt, d ugdud afransi i d-ikecmen s rrsas d idammen. Rnu yefka-d iḥulfan-is d tmuɣli-s ɣef wayen iḍerrun di tmurt n Lezzayer. Ass n 15 meɣres 1962, yiwet n terbaεt n l’OAS tessufeɣ-d Mulud Ferεun seg unejmuε,; rnan-d ɣur-s 5 n yimdanen-nniḍen Ali Hamouten, Salah Ould Awdiya, Robert Aimzrt, Marcel Basset d Max Marchand, tsenned-iten ɣer lḥiḍ,; syen akin teqqres fell-asen s rrsas tenɣa-ten. Yewwi-d fell-aɣ akken ad t-id-nebder i yal lawan, ad as-nner tajmilt acku yuklal-itt. Ayen i aɣ-d-yeğğa d agerruj ur nettfaka.
Islam Bessaci