Ussan-a ineggura, leswaq yellan di yal tamnaḍt deg tmurt n Lezzayer sserhaben. Imi, yuɣal umdan yettgami ad yerfed aḍellaɛ iwakken ad iruḥ ad d-yeqḍu. Widak iwumi fessuset texriṭ ur ufin win iwumi ara ḥkun iɣeblan-nsen. Lbaṭaṭa yellan yakan d asafar ttaɣen yimdanen s waṭas tuɣal ɛzizet, imi ssuma-s yewweḍ ɣer 60 n yidinaren. Ifelfel, d tidet yeqreḥ,; imi yettnuzu s 160 n yidinaren i kilu. Ṭumaṭic, s 100 n yidinaren. Wagi ma nebder-d kan isufar-agi i iwulef umdan. Ma nezzi s ayen-nniḍen, ad naf timellalin ttnuzunt s 12 n yidinaren i yiwet, d ayen i d-yekkan nnig tezmert n uxeddam. Irennu-d ɣer tama n waya lebsel s 50 n yidinaren, cclaḍa s 60 n yidinaren. Ma nḍegger tiṭ ɣer deffir, ad d-nini iḍelli kan i icektayen yifellaḥen s tlilit s lketra n lbaṭaṭa, am wakken ugaden ur tettnuzu ara. Reffu-nsen atan iban-d, wissen amek i as-ufan tiḥila almi tt-ssawḍen ɣer ssuma am ta. Yernu, taluft-a, teɣli-d akked ddiɛaya n tfernin, yerran amdan ur yeẓri anda ara yerr. Lbuṭ s uɛebbuḍ yexwan! Ar melmi ara tdum tallit-agi n lḥers, i d-qqaren yimdanen?
M. Smail