“Teččiḍ-iyi akk idrimen-iw!”, akka i as-yenna i tfiremlit-nni… wagi d yiwen n umuḍin n 50 n yiseggasen n At Ziki. Mi d-yeffeɣ ɣur ṭṭbib-is, uzzlen wid yettrağun nnuba-nsen ɣur-s ad t-id-εawnen acku yiwen n uḍar kan i yesεa… Mi t-sersen ɣef ukersi, yules-d tadyant-is, d tadyant i d-yessrun kra yellan din. Argaz-agi d ababat n 10 n dderya, d axeddam ɣur yiwen n umεellem, ttruẓun aẓru deg yidurar n At Ziki. Ssexdamen “lmina” i yiẓra imeqqranen. Yiwen n wass, telḥeq-it ɣer yidmaren, terẓa-as 3 n yiɣsan deg yiberdiyen-is… Akken ad ten-yessemlil, amejjay yeḍleb-as-d azal n 11 n melyun… Ticki di tezmert-ik ad tefkeḍ ula d ayen ur tesεiḍ,; awi-d kan ad teḥluḍ. Ɛeddan wagguren, mačči d yiwet i d-ineṭṭqen di tfekka-s: iεeqqayen yessursḍen, aman, akmaz, yettusečč akk uksum-is… Mi iruḥ ɣer ṭṭbib, ziɣen yekcem-it waṭṭan n ssker, mačči ala aya, ula d “les plaquettes” s wacu i ssemlalen iberdiyen-is yerẓen ur t-wulment ara acku yesεa aṭṭan n ssker rnu wexxrent deg umkan-nsent, leḥḥunt deg uksum-is, werğin yufi lehna. Timseqqfin, yeffeɣ-it-id udeddic deg uḍar-is, akken ur yettuɣal ara d ayen-nniḍen, gezmen-as-t.
Mi yuɣal ɣur ṭṭbib-nni “amezwaru” akken ad as-d-yekkes “les plaquettes”-nni, ahat ad yaf cwiṭ n lehna, yugi ula ad t-id-iqabel! Yesteqsa-d anda-nniḍen, nnan-as s 45 n melyun!
Ilaq “ad d-iɣez” 45 n melyun! Rnu wissen ma ur tḍerru ara yid-s am tikelt tamezwarut? Ad d-yağew aṭṭanen-nniḍen! Akka i tuɣal tujjya di tmurt-nneɣ,; ṭṭebbat d “les commerçants” ma d imuḍan d “les clients”! Adrim yessettu-ten akken llan ad d-rren tudert mačči ad tt-semremden neɣ ad tt-meḍlen. Ar melmi?
Djamila Ahitaghel