Taɣiwant n uɣbalu i yesɛan azal n 1500 n yisdawiyen mazal ur tessaweḍ ara ad teldi tiwwura i temkerḍit ara iɛiwnen inelmaden-a deg umecwar-nsen. Γas akken asenfar-nni n “tamkerḍit di yal taɣiwant”, yuɣ aẓar di tmurt-nneɣ,; maca di kra n yimukan akka am Tqerbust, mazal lecɣal tezzin tenḍen. Tirza n yimḍebber amezwaru n Tubiret ɣer tɣiwant ass n 06-12-2008 ahat d tagnit i yettunefken i yisdawiyen iwakken ad ssutren asenfar-agi. Tiririt n Ali Bouguerra d tin yessefraḥen, imi yegzem-itt dir rray iwakken ad teldi temkerḍit tiwwura-s di tɣiwant-agi di 8 n wagguren.
Γef wakken neẓra, inelmaden-agi ur nesɛi ara kra n umkan iwulmen ad ttilin deg-s di lawan n usgunfu ttarran ɣer leqhawi anda ara yuraren am nutni am at taddart ddiminu neɣ lkarṭa. Mebla ccekk, d ayen i yessenqasen deg uswir-nsen mi akken ḥwaǧen idlisen, d ttawilat imaynuten am “l’Internet”;
Wigi yessutren asenfar-agi ahat sɛan tamuɣli s lebɛed, imi bɣan akken ula d imeẓyanen ad lemden taɣuri n tektabin, d ayen ara ten-yeǧǧen ad xḍun i yiberdan-nni ara d-yawin lemḍerra i tmetti. Am wakken bɣan ad tili temkerḍit d annar i tussna d tmusni.
M. Smail