Tebda ussan-a di akk tudrin n tɣiwant n Chemini lḥemla n umarki deg yisenfaren n PPDRI, yellan d ahil n n tallelt i tettak ddula i yifellaḥen n temnaḍin yettwaεezlen neɣ n tudrin. Ahil-a i d-yessufeɣ uɣlif imkellef s usnerni n tudrin (MDDR), aṭas yakan n yifellaḥen i yesfaydin deg-s ladɣa di lwilayat-nniḍen anda i yebda leqdic deg-s aseggas n 2007, tallit-is d tin ara idumen alamma d 2013.
D tisquma n tudrin i d yellethan s ujerred n yismawen n yimezdaɣ i iqeddcen di tfellaḥt ɣas ma iεeggalen i tent-iεemren ur ɣur-sen ara isallen ɣef wahil-a amaynut. Leqella-yi n useεlem teğğa kra ad cudden taluft ɣer «lḥemla n lbuṭ n 09 yebrir», deg wakken aṭas i ijerrden ismawen-nsen imi sseḥmacen ad ten-tεiwen ddula.
Mi neεreḍ ad nawi ugar n yisallen, nqerreb ɣer lbiru n tɣiwant yerzan aḥareb ɣef tẓegwin imi d nutni i yettukelfen s taluft-a. Imḍebber d wi nemlal, ula d netta ur ɣur-s ara ugar n yisallen, yenna-d kan dakken: “D lamer i aɣ-d-yusan si tenmehla n tẓegwin n Bgayet akken ad asen-nefk lejridat n yismawen n yifellaḥen i wumi tlaq lemεawna; ɣef waya nefka lmuhimma-agi i yimɣaren n tudrin, imi d nutni i yessnen anwi i iwulmen”. Mi t-nesteqsa amek ara tili lemεawna-ayi, yenna-d: “Ahil-a yerza wid i yettrebbin lmal ama d abeqri neɣ d aɣelmi, yerza daɣen wid i yettrebbin tizizwa. Ddula teεzem-d ad ten-tεiwen s tedrimt lqima-ines 30 melyun suntim”. Ad d-nesmekti kan, di tɣiwant n Chemini, aṭas n yifellaḥen i yettrebbin lmal ladɣa abeqri maca ttemlilen uguren imeqranen gar-asen: lqella n lεic d waṭṭanen mebɣir ma nettu takerḍa imi deg udrar i asent-ttserriḥen.
Mokrane Chikhi