Amussu adelsan n tɣiwant n El-Adjiba yettheggi iwakken ad yerr tajmilt i unaẓur Salah Sadaoui ilmend n umulli w-4 segmi yemmut.
Yiwen n wahil s wazal-is i d-yettwaheggan ilmend n tegnit-agi anda aṭas n yimdukal n win akken yecnan “yecreq yiṭij yuli wass” ara d-yerzun iwakken ad d-mmeslayen fell-as, ad as-rren tajmilt akken yuklal. Yiwet n temzikkent tettwahegga yakan, tegmer-d amecwar i yuɣ Salah Sadaoui, si temẓi-s almi t t-tewwi tmettant.
Aṭas n yinaẓuren i d-ibeggnen lebɣi-nsen ad kkin di tkaska-agi, bɣan akk ad rren tajmilt i win akken irefden azal n Lezzayer asmi akken yeḥma useqqi. Dɣa, deg useggas 1961 yecna “Ḥizb tuwwar”, mi akken kkren-d ɣur-s ad t-nɣen di tzeqqa ideg yecna. Tirrugza yekseb, ur t-teǧǧi ara ad yanez, ikemmel amecwar, yecna yessefra s teqbaylit s taɛrabt, i Lezzayer.
Γef waya, amussu-agi s lemɛawna n tɣiwant n El-Adjiba bɣan akken isem n unaẓur-agi ad yaru s yisekkilen n ddheb deg wallaɣen n yimdanen.
M. Smail