Aniwa gar-aneɣ iwumi ur tezzi ara tasa ass n 25 di yunyu 1998 ? yeɣli-d ṭṭlam deg uzal, temɣebbas ṣṣura n yal Aqbayli. D Lwennas iwumi qemmḍen rruḥ,; nwan ad rren timedlin i tmurt n Leqbayel.
Ma nesnunnec cwiṭ deg wayen i d-yenna, ad naf “ Idles nneɣ d anagi, d aẓar-is ara neḍfer”. Yekker ujajiḥ di yal tama, suɣen yemdanen, ḥsan belli “Ttif ad negrent tudrin wala ad yenger lasel”.
Lwennas, d amedyaz, d anaẓur daɣ d amǧahed. Anta taluft ur iqubel ara? D ameɣnas i yesdukklen awal d tigawt ( action). Melmi akka I yessedreg aqerru-s di ddiq? Yak yenna-d:” win yessusmen iɛemmed neɣ yettekka”. Netta ula tettɛeddi ara fell-as tcalwawt.
“Yeḥzen Lwad Ɛisi, mi yebda imenɣi”, asmi akken tettwakkes lḥerma ɣef tesdawit, Lwennas isuɣ,; mazal ar ass-a yettuɣu-d seg uẓekka ɣef tedyant-agi. Di tuber 1988, tiɣri-s ɣer lehna ixelles-itt s 5 n terṣasin n yiǧadarmiyen dug ubrid n Michelet. Asmi akken yecna” Ay amsebrid s At Yanni”. Gezren-t, ceddren-t, lameɛna ṣṣut-is mazal yettbeɛziq, yal tizlit d taktabt, d tamsirt, “Imeslayen-is ttakken abeḥri i turret”. Ajajiḥ n rrebrab yuɣen di Lezzayer ur t-izgil ara. Aḥwas-is s-ɣur irebraben yesseɣli-d rrehba, atmaten-is bedden “Comme un seul homme qui a osé défier la peur”. Yezzi, yenneḍ wawal, yal wa amek i yettɣenni : Ahat yeffer iman-is, d imeddukkal-is i t-yeffren…atg, i lmut-is? D netta i tt-iheggan? “Cwiṭ n ṣwab maḍi maḍi, wigi la ineqqen banen”.
D aɣurru ! Yumen s tmaziɣt, yumen s tdukkli imi yenna: “S kra n win yellan d aqbayli, ad t-neqsed ad t-nesseḥḍer”. Ikabaren n tmurt n leqbayel iquder-iten, ur yelli d axṣim wala d aɛdaw. Segmi yeḥsa s yiɣisi yewwten gar watmaten-is, yuzen –d akken yiwet n tḥerzet, anda i d-yenna:”Imeslayen-nni n umeddakkel Lhacimi, d Dda Lhusin neɣ Saɛdi…”
A nwali acḥal meqqer usirem n Lwennas s aẓeṭṭa n tegmat !
Asirem leɛmer i t-yeffiɣ,; ula asmi akken qessiḥit wussan n tudert-is, ɣas ma yella sya ɣer da iteqqes s yimeslayen, ur yesseqdac taɛdawt: yenna:
D lwaǧeb asirem ad yili
Deg wulawen ad yefti
Ɣas akka lweɛd iteqqes
Ma yella wwteɣ di gma ass-agi
Tasa-w ur t-tugi
Bɣiɣ kan ad yefriwes
M. Smail