Avirus amaynut i d-yekkan seg Mexique iwmi qqaren “Grippe porcine A(H1N1)” yenfel ɣer wazal n 12 n tmura ussan-a. Lezzayer, am nettat am tmura-nniḍen, ur temniɛ ara deg tedyant-a imi avirus-a yeshel ɣef umdan ad t-yeṭṭef. Dɣa, lemḥadra terna ddurt-a, tugart deg tlisa n tmurt, anda win i d-ikecmen yezmer ad t-id-yawi yid-s. Meɛna, tidet kan akken i-d-yenna umejjay deg sbiṭar n Bgayet, Dr Amarouche : « ad tt-iqel kan Rebbi, awer d-amrent tedyanin am ti ɣer tmurt-nneɣ. D acu ma tella tessaweḍ Lezzayer ad tɛas akken ilaq deg yinafagen, d wansa i yemzer ad-yekcem, ussan-a, yiwen seg berra, tezmer ad tessebɛed ccedda fell-aneɣ. » Lḥukuma n Lezzayer, akken i d-twessa Tuddsa n Umaḍal n tezmert (OMS), tessaweḍ lḥers ɣer w-5 deg tlisa n tmurt. Imi akken i d-tenna tuddsa n OMS : « avirus irennu deg tmenɣiwt n yimdanen, d timerna kan ara yernu tugart ma yekcem ɣer tmura tiḍeɛfanin am tid yezgan deg tefriqt neɣ deg l’Asie. » Aya, tenna-t-id ass n 25 deg yibrir, d ayen i yessefjaɛen ! Akken i d-qqaren imussnawen yerzan tadyant n yivurisen, ur ilaq ara ad nexelɛ. « Yegget wawal deg tmura tiberraniyin, d ayen i yessagden imdanen. Daɣen, tuddsa n umaḍal OMS, s lemḥadra, tessezwar-d ulɣu-ayi akken lḥukumat n ddunit ad swejdent iman-nsent ur ttɣimint ara ɣer ddqiqa taneggarut”, i d-yenna umejjay Saâda Chougrani i ixeddmen deg sbiṭar n Wehran. Ma professeur Mustapha Maâoui, n sbiṭar n Kouba, yenna : “Yezmer lḥal atan da yakan imi yeshel akk ad yenṭeḍ gar yimdanen. Meɛna ur ilaq ad nagad imi ɛeddant aṭas n lmeḥnat am uvirus “Grippe porcine A(H1N1)” deg tmurt-nneɣ. Nedder yakan tidyanin yecban choléra, typhoïde, la peste deg Wehran iɣef d-yura Albert Camus.” Avirus-a n “Grippe porcine A(H1N1)” d win ineṭṭden seg umdan ɣer wayeḍ s nnefs, s yifassen, s tusut n yiwen zdat wayeḍ,;… Lḥasun yeshel ad yenṭed, ur teẓriḍ amek. Imi d-yewweḍ ɣer tmurt n l’Espagne, azal n 13 n yimdanen i t-yeṭṭfen din, dayen ihi yezger seg Mexique akked d lmarikan ɣer tmura n l’Europe, d ayen isehlen akkya ad d-yaweḍ ɣur-neɣ imi ttruḥun-d seg syin. D acu kan, ɣas avirus “Grippe porcine A(H1N1)” yella yerna yuɛer tura, s teqbaylit waqil, tufa-yas-d isem tilibizyu Berbere TV “tawla n yilef neɣ n uḥelluf”.
Djamal Ikhloufi