Azekka-nni n tuber 88, yelli udabu, ur d as-yehwi tiwwura, i tdukliwin n tsertit. Llint-d daɣen tewwura i yiɣmisen d wawal ilelli. Ussan-nni, hḍer d taruḍ ɣef yiman-ik. Ulac win ad ak-yinin : d acu tettaruḍ a winnat !? Usmen seg-neɣ ula d leǧnas. Takmamt-nni i aɣ-yerra udabu si 62 teqqres deg yiwet n ddqiqa. Tegguffa-d tlelli deg yiɣmisen almi yuɣal ujernan d annar n « ini-d kan ». D la récréation !, akken i as-yenna winna. Si tama-nsen, ikabaren daɣen lhan-d d « ini-d kan ». Ttun belli tugdut d aɣanim, leqqaq uɛenqud-is, yessekanyit kra n waḍu i d-yessuḍen, ttun belli d agdud d tikti n citoyenneté i yessejhaden ifadden n tugdut. Lhan-d d « la fabrique des militants ». Di tallit-nni, yeɛreq-as ccḍeḥ ula i uɣmis. Deg lawan-nni ideg ilaq ad ḥarben ɣef tlelli i d-tḥerra tɣamsa, ufan-d iman-nsen yiɣmisen sserwaten deg unnar i ten-yexḍan, deg unnar n yikabaren. Aɣbel n uɣmis d « fabriquer une opinion ». Yuɣal uɣmis d amkan i d-iqessed s kra n win yettwaḥqren. Yuɣal d jujddebi, d l’assistante sociale, d abulisi… yuɣal d kullec, maca yettu belli tawuri-ines d asiweḍ n yisallen, akken bɣun ilin, i uzzayri, d allal yessnernayen afud i tlelli d tugdut. Γas akken ilaq ahat ad d-tɛeddi si liḥala-nni, tkemmel tɣamsa kan akken deg ubrid tt-yexḍan, almi tt-yewwet wugur. Taf-d iman-is tehtuta. Ulac win i izemren ad as-yini i uɣmis tzegḍeḍ-tent a winnat : c’était politiquement incorrect. Ɛecrin d aseggas i iɛeddan seg wasmi tegguffa tlelli deg yiɣmisen. S syin ar ass-a acḥal d aneɣmas i ikecmen lḥebs, acḥal daɣen n wid yemmuten iwakken ad tidir tlelli-agi. Ass-a, ur ilaq ara ad ten-nettu, d lwajeb-nneɣ ad netbeɛ later-nsen. Ayagi ur yettili ara ḥala ma nerra tamawt ɣer liḥala ideg yettidir uneɣmas (tajernant-is) d usileɣ-is (formation), ladɣa asileɣ n yineɣmasen-nni i d-yettawin lexbarat yeḥman, yeɛnan tudrin neɣ lexbarat yeɛnan tameddurt n yal ass n yizzayriyen. Ass-a, d tameɣra tagreɣlant n tlelli n uɣmis, d tagnit ideg ilaq-as ad nettu lgazuz d lgatu u ad nbedd, ad nwali amek ara nesnerni di ljehd n tɣamsa i ibennun, yesnernayen di tugdut.
T.O.A