Ussan n umezgun s tmaziɣ di tmura n tmazɣa i d-yellan deg wass n 7 ɣer 12 deg waggur n mayu, i d ijemɛen timura n Tfarka Ugafa, deg uxxam n yidles Mulud Mɛemmri n Tizi Wezzu, i d-yettwaheggan sɣur uxxam umezgun Kateb Yasin n Tizi Wezzu, rzan aṭas n yilmeẓyen yeffuden tifaskiwin yecban tigi. Iswi-ines amezwaru d tiririn n ccan n umezgun amaziɣ di Tferka Ugafa akked tmura i d-yezzin i yillel agrakal. Ilmend n waya heyyan-d yiwen n wahil n umezgun ideg llant timezgunin n tmurt n Lezzayer d Lmerruk, Tunes akked Libya, d yisaragen ara d-yawin awal ɣef umezgun akked umezruy n umezgun.
Tamezgunt tamezwarut d “Sinistri” i yura Muḥya, i d-ihegga umezgun n Kateb Yasin. Akken llant tmezgunin-nniḍen am “Alɣem abuhal” i d-thegga terbaɛt n Batna, “Timiqwa n tmucuha” n terbaɛt n Wahran, “Tislit n Unẓar” d “Agu” n terbaɛt n Lmerruk, d tecqqufin-nniḍen.
Ayen i d-yufraren deg wussan-agi d aselmed n 12 yilmeẓyen seg Tizi Wezzu deg tira n umezgun ilmend n usegmi n uḥric amezgun amaziɣ. Saramen ad yennerni umezgun amaziɣ i uɣalen d tafaska s wudem unsib, imi tafeska n Tizi Wezu d tis tlata, mbeɛd tin n Begayet d tin n Batna.
Ilaq ad nerr lwelha belli aḥric n umezgun yesɛedda yiwet n tallit iweiwren iseggasen-agi ineggura, ladɣa deg useggas 2001 anida yemdel tiwwura-s uxxam n umezgun Kateb Yasin, ar assa mazal lecɣal n uheggi-ines ur fukken ara.
Dalila I.