Anwa ur nessin tala tasemmaḍt neɣ akken i d-as qqaren s tefransist “la fontaine fraîche ». Amkan-agi d win i yecebḥen nezzeh, acku tella-d deg yiwet n teẓgi i imucaɛen aṭas di tmurt n leqbayel, imi tugna-s d tin yessefraḥen, s ccbaḥa-ines. Γef waya i d-ttruḥun aṭas n yimdanen ama d wid n daxel n tmurt neɣ d iminigen di yal tasemhut. Muḥal ad d-tɛeddiḍ ur d-tettafeḍ ara imarrayen ladɣa deg taggara n yimalas neɣ deg wussan n yimuras, imi imdanen uḥwajen ad kksen lxiq wa ad beddlen abeḥri ; ladɣa wid i yezdɣen di temdint, yenɣa-ten uɣebbar d duxxan n ṭunubilat n yal ass. Arrac imecṭaḥ ttafen iman-nsen, acku llan kra n yiɣersiwen di teẓgi-agi am : ufrux n ṭawes, ikerri bu 4 n wacciwen, alɣem akked yibkan. Yerna sɛan tilelli ad uraren akken i d-asen-yehwa alukan ad ten-nseqsi ad d-inin : « ur nessaram ara ad d-yeɣli yiḍ,; axaṭer uraren necraḥen, kksen lxiq. » Mi d tameddit ttuɣalen akk yimdanen s ixxamen-nsen, maca ur keččmen ara s ifassen d ilmawen acku ttɛemmiren aman di tala tasemmaḍt, yerna ttaɣen kra n tɣawsiwin n ufexxar ara yeqqimen d asmekti ɣef wass-nni, ttafen daɣen tteswirat d yiɣersiwen i yellan di teẓgi n Iɛekkuren.
Oussaidane Lamia