“Temẓi tessen, tezmer”, d awalen qqaren yilmeẓyen n tdukla tusnant n temdint n Tizi Wezzu. Beggnen-t-id s leqdic-nsen ; imi deg wahil n tdukla-a, ad naf aṭas n yiḥricen : timsikent tusnant, tussna n twennaṭ,; amezgun ussnan, tussnakt s wurar, atg. Ayen yeṭṭfen lwelha-nneɣ s waṭas, d timsikent-nni xedmen deg uxxam i yidles n Mulud Mεemmri anda d arrac imecṭaḥ i d-yessefhamen leqdic n tdukla-nsen (d leqdic-nsen ula d nutni), i yimeqqranen i d-yerzan ɣer din.
Am wakken daɣen tidukla-a tettheyyi-d yiwet n temsizzelt i yilmeẓyen i yebɣan ad kkin s yisenfaren-nsen. Asentel n usenfar ilaq ad d-yawi, ɣef wakken i d-yenna Belkacem Amara, imḍebber n usenfar : « ɣef twennaṭ akked usnulfu s umata di yal aḥric, timsizzlt-a tella-d s lemεawna n tenmehla n yilmeẓyen d waddal, n tenmehla n yidles n Tizi Wezzu, … » Ayen xedmen imḍebbren n tdukla-a d amedya i wid d tid yebɣan akken arrac-nneɣ ad ilin d irgazen n uzekka, ladɣa mi ara nwali acḥal n yilmeẓyen i d-iḍegger uɣerbaz ɣer berra, ilaq i tdukliwin ad asen-gen irebbi.
Lhocine Ourezki