Tesmekta-d tidukla GEHIMAB amusnaw Taher Aweɣlis i tikelt tamezwarut. Aya yella-d ilmend n temlilit n tussna yitran n Bgayet ideg d-yella usekfel n udlis i yura deg uḥric n usiḍen n wakud « Da-irat fi maεrifat al-awqat wal ayyam ».
Argaz-a yettwasnen s yisem : Cheikh Tahar El Djazairi El waghlissi Essemaouni, ilul di tmurt n Suriya deg useggas n 1852. D baba-s Saleḥ at Ccix yeɣran di temεemmert n taddert-is : Semεun(Sidi Lḥaǧ Ḥsiyen) i d-yezgan di tɣiwant n Chemini, i yunagen ɣer tmurt-a deg useggas n 1847.
Yelmed Taher Aweɣlis ɣer baba-s yellan d lmefti n lmedheb amaliki din di Suriya. Daɣen, yesselmed-as baba-s taqbaylit i yes-s yettmeslay akken ilaq akked warraw n tmurt-is i yellan dinna s waṭas. Mi d-yemmed yekcem ɣer uɣerbaz amezwaru anda i yelmed taṭurkit akked tfarsit d tusniwin yecban : tusnakt,tussna yitran d tussna ugama. Syin yekcem ɣer tesnawit ideg yelmed tafransist akked tutlayin ticerqiyin-nniḍen, yuɣal yessen tmanya n tutlayin. Meɛna s tefransist ara d-yeldi tiṭ-is ɣer tɣerma yennernan imiren di tmura n umalu.