D lewhayem yir leεyub i d-yennulfan, i d-yettnulfun di tmetti-nneɣ ! Xas akken, tura mbadalen lecɣal, tuẓ tagnit ɣer zdat, maca yir tikli akked yir ṭṭbiεa, werjin tebɣa ad aɣ-texḍu.
Aya nwerti-t ɣef yiseggasen n tmanyin, asmi yal taɣawsa tella d asafer. Lixsas n yimir i yerran imdanen, uqbel ad d-teldi tiwwura-ines lbusṭa neɣ lbanka neɣ amunupri, ad taffeḍ dinna imdanen bedden ggunin, ttrajun akken ad ḥellin nnuba tamezwerut.
Meεlum ad d-yili waya di lawan-nni, acku kulci ixus. Maca i turra ? D acu n tmara ara yeǧǧen imdanen ad d-kkren ɣef setta n ssbeḥ,; urεad tefrari, akken ad zwiren ? Dɣa, mi d-yewweḍ lawan n tullya, d amḍegger, d amderkel anwa ara yawḍen d amezweru ɣer ugici.
Ɛni yura fell-aɣ i leslaf ad nilli d imhujriyen ? D ufiɣen n leεqel ? D acu n tmarra i aɣ-iḥersen ad nettemḍeggar gar-aneɣ neɣ zdat tewwurt, mebla ma nquder la amaɣar la tamɣart.
Iberdan n tneflit beddun s tukksa n yir leεwayed. Yiwet deg-sent d ta : tuffɣa n leεqel akked unejli n sswab.
Ait Slimane Hamid