Taɣiwant n Bgayet, am tal tikelt, theyya-d ahil sway ara tmager wid i d-yettḥewwisen ɣer-s, sway daɣen ara tessedhu imezdaɣ-is. Akken ad nwali anda wwḍen lecɣal d wamek ara lḥun, nefka awal i mass Zaydi Ḥakim, yiwen seg yiɛeggalen n tesqamut n tmeɣriwin n temdint n Bgayet.
Acḥal n tedrimt i d-tefka tɣiwant i usbeddi n wahil n unebdu aseggas-a ?
Ḥ. Zaydi : Di tazwara riɣ ad wen-d-iniɣ tanemmirt mi d-tgim azal i wahil i d-theyya tɣiwant, i unebdu n usaggas-a 2009. Taɣiwant theyya armud (activité) meqqer, win ara tmager s waṭas n tedrimt. Aseggas-a asqamu n tɣiwant yemtafaq ad d-yefk azal n ɛecrin melyun n yidinaren. Ma nquren-it ɣer yilindi, ad d-nini tadrimt aseggas-a terna qrib tlata tikwal.
Acu yellan deg wahil aseggas-a ?
Armud, aseggas-a ur iḥebbes ara s teɣzi n unebdu. Gar lecɣal i d-nheyya yella wayen isenden ɣer waddal, yella wayen imalen ɣer yidles. Akken daɣen ur nettu idis amettan (social). Ad d-fkeɣ amedya ɣef leqdic amettan, taɣiwant n Bgayet tekra-d imeḍqan i usgunfu rrif lebḥer i wid teǧǧa tedrimt. Deg-s ad d-tettwafk tegnit yerna baṭel i twaculin, i yilemẓiyen, zedɣen taɣiwant neɣ berra i tɣiwant ad farsen tallit n unebdu i usteɛfu. Ayen yeɛnan addal, taɣiwant tefka-d sebɛa imelyunen n yidinaren i umaraṭun 2009. Ma d asider (animation) s umata, ad t-nebdu s sin n wussan ilmend ussan n warrac (journée de l’enfant) i iɛeddan yakan. Ad tili tafaska n taḍsa seg 24 ar 30 yunyu. Syin akkin d tafaska n ccna amaziɣ. fiḥel ma nettu ad d-nader irmad ara yilin di temdint Bgayet neɣ ɣer cceṭ n lebḥer akken ma yedda unebdu. Γer taggara, ad tt-nekfu s ssehrat deg wussan n remṭan.
Ahil ad t-teddem tɣiwant iman-is neɣ ad tekkin ɣur-s tdukliwin ?
A win yufan ad nesdukel ifadden akken ad d-nbeyyen ccbaḥa n temdint-nneɣ. Taɣiwant n Bgayet teldi-d tiwwura i wid d tid i d-isutren liɛana, wid d tid izemren ad d-seftin lecɣal sway ara tzux Bgayet.
Ayen yellan d armud seg zik, ɣef lmend n tɣiwant, nerfed-it s yisem n Tzeqqa n tmeɣriwin. Ayen i d-yernan yebḍa d iḥricen. Tidukliwin isuturen deg-neɣ idrimen, nefka-asent ilmend n wahil-nsent am tdukla “Project’heurt” deg ssinima. Leqdic-a yeɛnan “ussan n warrac”, kkint deg-s taɣiwant, tanmehla n tigawt tamettant (DAS) akked tdukla Ḥanan.
Ait Ighil Mohand