Tafaska n yidles n tmura n Tferka, d leqdic i d-ijemlen, iɛummen
ɣef tfaskiwin-nniḍen. Deg-s, yal asnulfu afriqi yettaɣ azal.
1969/2009, rebɛin n yiseggasen i yezrin gar tafaska tamezwarut n yidles n Tferka d tis snat ara yilin di Lezzayer tamaneɣt seg 5 ar 20 yulyu i d-iteddun. Tikti n usuddes n tfaska-ya, tlul-d di Nairobi, tamaneɣt n Kenya. 5 n yimelyaren idinaren i d-iheyya uneɣlaf n yidles azzayri, akken ad d-tili tafaska-ya, rran ad tili d tajmilt i tnaẓurin d yinaẓuren i d-yefkan llsas i yidles di Tferka, ur tettili d amzizwer. Γef teɣzi n tallit iferqen gar tafaska tamezwarut d tis-snat, mass Yahi, yenna-d : « Ggtent ssebbat; d tamezwarut imi tugett n tmura ur wwint ara ɛad timunnent-nsent, tis snat teɛna aḥric n yisurdiyen. »Tafaska-ya tadelsant, teɛna ccḍeḥ,; ccna, amezgun, tiktabin. Rnu ɣur-s Tid ara d-isegmu yiwen, deg tmura n Tferka, am la chorégraphie, taklut, dessins animés… Taẓuri t-7 tesɛa aḥric, ad ilin yisura ama deg yebraḥ n usgunfu neɣ deg urtiyen, akken daɣen ara d-ilin deg sinimat.Deg ccna, Mike Stern, yettgerrizen turart n snitra, ad yekki, daɣen anaẓur Aka Moon, n Sinigal, yetturaren le jazz fusion, ifennanen imeqqranen n lmuziga, yecban Salif Keita, Archie Shepp d wiyaḍ. Ad ilint, daɣen, trebbaɛ n ccna taneslit. Γer taggara, ad d-tili temlilit d turart n tmuzigt d yinaẓuren n l’Orchestre symphonique aɣelnaw d l’orchestre philharmonique neɣ symphonique du Continent.Taẓuri t-4, d tin ara yaɣen aḥric meqqer. Ad d-ilin yisaragen ɣef tikli i d-yelḥa umezgun n Tferka, timlilit gar yimarayen imaynuten d yiqburen, aselmed n waṭas yiḥricen yeɛnan amezgun (tadlegt, asali ɣef usayes, tafat, …). Leqdic-a d tajmilt i yinaẓuren i d-yebnan amezgun di Tferka am Jean-Pierre Guingame n Burkina Faso, Habib Denbili d Fanta Diawara n Mali d Kously Lamako n Tchad. Ad ilint timura-nniḍen Sinigal, Maser, Tunes, Côte d’Ivoire, Ghana ad kkint s trebbuyaɛ-nsent n umezgun.Γef tsekla, tafaska ad d-terr tajmilt meqqren i yifriqiyen yewwin arraz Nobel : amasri Naguib Mahfouz, Wole Soyinka n Nijirya, Nadine Godimer d John Maxwell Coetzee n Tferka Wadda.S teɣzi n 24 wussan, ideg ara d-tili tfaska-ya tis snat n yidles n tmura n Tferka, tamurt n Lezzayer tebɣa, leqdic-a, ad yili d win n tlelli i yal aḥric n usnulfu, d timlilit i yinaẓuren neɣ i yimezdaɣ s umata n tmura n Tferka.
Ait Ighil Mohand