Di teẓgi, yella wurar n tudert d wurar n lmut. Tudert d lmut n yiɣersiwen akked yisekla yettidiren din. Mi yemmut useklu, asɣar-is yettuɣal d leɣbar swayes d meqqin isla-nniḍen. Di teẓgi, din i as-d-tettas i unaẓur Said Mhend leqdic n usɣar d lfen s umata. Mi yekcem teẓgi, rezzunt-d fell-as tewkilin n tẓuri. Dɣa, imir kan ad berqen wallen-is ɣef usɣar n uxlenj, yeɣlin ɣer lqaε yettgani tamattent. Maca asɣar-ni mi d-yeḍḥa gar yifassen n Saidi Mhend, mi t-tmuqel tiṭ-is, yuɣal yettqalab-it akin akka, yettuɣal deg wallaɣ-is d ayen-nniḍen, yettuɣal d talaxt ara yefken tafekka i kra aken ara d yesnulfu. Taqabact yellan ɣef tayet-is, tḥulfa s wayen-nni. Daymi i d-tebda argagay s lḥir ula d nettat akken ad d-tebdu ccɣel-is, ad as-tegg udem i tikti n unaẓur. Ula d lmus yellan di lǧib-is yebda iḥebbek, acku yeẓra d netta i d leqlam ara iḍebεen tidmi n unaẓur ɣef usɣar akken ad tban tecbeḥ temleḥ. D netta i d allal anegaru ara s-igen lebɣi i lebɣi n unaẓur. Di teẓgi, Saidi Mhend, yettawwi-d asɣar n uxlenj tḥuza tmettant s yicaren-is. Maca, mi d-yewweḍ gar yifassen-is, yettleqqiḥ deg-s rruḥ s nnefs n usnulfu, akken ad yidir tudert-nniḍen tin ur nfennu.
Hamid Ait Slimane