Γef uḥbib, yenna Lwennas : “D kečč ass-a i d tagecrirt-iw, d mumu n bballen-iw, ttxilek uryi-ttaǧǧa ara”, dɣa nqerreb ɣer Boudjemaa Agraw, yiwen seg wid yellan d iḥbiben n Matoub, akken ad aɣ-d-yawi awal ɣef le rebelle. Deg lqahwa-s anda i t-nemlal, yenna Boudjemaa : “timlilit tamezwarut d tin ur zmireɣ ad ttuɣ. Tella-d deg useggas n 78, yufa-yi-d deg tzeqqa n usekles Jackye Ereagan. Imir i d-yusa ula d netta ad yessekles tasfift-is tamezwarut iwmi i isemma “ay izem”. Nɛawed nemlal deg useggas n 79 i nemlal ɣer Remḍan (d adrabki) deg 21 arrondissement. Newwet-itt almi i s-neqqar i uɣyul ssek. Iḍ-nni, newwet-it d adelweḥ s renault 5 ines almi d-yedfrari wass. Seg yimir almi d asmi i yensa ur nemfaraq. Tal tikelt ara nemlil, ad d-yili kra. Aseggas n 80, nesbedd-d tikli di Lpari, ɣer tmahelt (ambassade) n Lezzayer yezgan deg Place des Etats Unis, ipulisen ɛnan-iyi-d, refden-iyi ɣer ufurgu. Mi ten-id-yeẓra Matoub, iruḥ-d yettɛeyyiḍ fell-asen. Rnan-t-id ula d netta gran-t-id ɣer daxel. Sawḍen ɣer yiwen uhungar di Vincennes, ǧǧan-aɣ din almi yefra wurar n tikli, dɣa serrḥen-aɣ-d imir. Aseggas 83, nexdem tameɣra di Bni ℇemran. Lɣaci imerreḥ-d s yal tama. Aseggas 85 deg Wertilan, imferjen steqblen-aɣ-d am uselway n tegduda. Lɛessa bdan-tt-id s tɣiwant n Sedduq. Mi nekfa, ipulisen twilayt n Sṭif, jemɛen wid akk i d-iheyyan tameɣra-ya. Aseggas 88 di Bgayet, yenced-it-id Racid Dali, ad iɣenni i tejmilt i as-d-rran. Matoub mi iwala Mourad Boutadjine, yeɛna-t yenna-yas : “ad trefdeḍ igerwazen-ik n tilibizyu neɣ ad k-ten-rẓeɣ.” Ladɣa, ifuk ccna, yiwen ur iɣenna imi ruḥen ara.”Awal yettawi-d wayeḍ ɣef usafu ur nensi, yettqeddimen bla lxuf. Γef wamek i yettwali Boudjemaa Matoub, yenna : “terẓa-s la marche arrière. Limer yedder, tili aṭas n lecɣal i yefran ass-a. D amdan n wawal, ma yenna-d kra ad t-yexdem. D ameɣnas qbel ad yili d acennay. S yimdanen am netta i yeḥbes rrebrab ur d-yekcim ara ɣer tmurt n Leqbayel. Limer yedder tamrawt n 2000, ur ḥsiɣ Matoub ad ibeddel kra deg yerzan tamuzigt. Ma deg yidis n umennuɣ,; tili ibeddel aṭas n lecɣal. Amer yedder mačči win iɛeddan ad yeddem rray ɣef yimaziɣen akked tmaziɣt.”
Mohand Ait Ighil, Dj. Ikhloufi