Seg wasmi i temlal tdukla n yiselmaden n Tmaziɣt “Tidmi” d lwali n Bgayet ass n 12 deg yibrir 2009, anda i teḥḍer tnemhalt n usegmi n twilayt, aṭas n wuguren i yufan tifrat-nsen ass-a. Lwali yegzem-itt di rray, assen-nni yakan, ad d-tili timlilit-nniḍen deg wayyur n yulyu akken ad iwali s timmad-is ma ttwaḍefren yiwellihen i yefka i tnemhalt.
Dɣa, seg wassen ur ḥbisent temliliyin gar tdukla Tidmi d tenmehla n usegmi. Taneggarut d tin i tt-yefran ɣef uɛiwed n la carte scolaire akken ad yennerni uselmed n tmaziɣt deg Bgayet, d asentel n unejmuɛ ara yeḍrun deg timlilit n wussan-a. Daɣen d tin i d-yewwin 3 n yimaswaḍen ijdiden (sin i uɣerbaz amenzu, yiwen i uɣerbaz alemmas) ara yebdun leqdic-nsen deg unekcum aɣurbiz ajdid. Rnu ɣur-s azal n 100 les postes budgetaires ijdiden i i yiselmaden n tmaziɣt.
Deg wayen yerzan asileɣ n yiselmaden, 3 temliliyin i d-yellan i yiselmaden n uɣerbaz amenzu s lemɛiwna n lwali. Adeg n usileɣ d tanmehla i t-id-yefkan i tdukla, ma d ttawilat n wayen ilaqen i temliliyin ama d lkaɣeḍ ama d učči d lwali i ten-id-yessersen. Mazal taneggarut iɣef iṛeggem lwali ad iɛiwen yes-s, ad tili d timlilit taɣelnawt n yiselmaden n Tmaziɣt, ad d-teḍru deg Bgayet ɣef uselmed s usenfar, anda ara d-asen yiselmaden n Paris 8 akken ad ikemmel umecwar n tarrayt-a i yedba Usqamu Unnig n Timmuzɣa HCA.
D. I.