Lhocine Ourezki
Mi d-yewweḍ lexber taddart, igenni yeɣli-d ɣer lqaεa. Yal wa yettwali wayeḍ am wakken yettrağu deg-s ad as-d-yini ma d ssaḥ teḍra twaɣit-a ; sin n yilmeẓyen mmuten mi ten-id-tewwet trisiti. Γef wakken d-yenna yiwen inigi : « Sin yixeddamen-a, mi ruḥen ad sbedden apuṭu n trisiti s tmacint di tama n tmizart n leɣbar yemḍerkal-asen dɣa yennul lexyuḍ n trisiti iğehden nezzeh, tewwet-iten-id ur ten-tezgil ara. Ur sawḍen ara tarwiḥt ɣer sbiṭar. » Ass n lexmis iεeddan i d-tella tenḍenlt n yilmeẓyen-agi. D tikelt tamezwarut deg umezruy n Tala Athmane i d-rzan wanect-nni n lɣaci ɣur-s, rnan-d ɣer yimeẓdaɣ n taddart akken ma llan s umecṭuḥ s umeqqran i iruḥen ɣer tmeqqbert, iberdan neflen. Imeẓdaɣ n taddart-nwen ttmennin-awen rreḥma a Mourad, ay Arezki, ad d-yefk Rebbi ssber i yimawlan.