Tafaska tis 6 n Iwennan “Raconte-arts”, teldi tiwwura-s s wudem unsib ass n 29 di yunyu di taddart n Wizgan s teɣzi n 5 wussan. Tafeska-agi tsuddes-itt-id tdukla n tẓuri n sinima n Tizi Wezzu, s lemɛawna n uɣlif n yidles, asqamu unnig n tmuzɣa, taɣiwant n Wizgan, taɣiwant n Lamballe n tmurt n fransa, imezdaɣ n taddart n Wizgan akk d Alstor Tafaska agi ussand ɣur-s deqs inaẓuren, nnig n 200 i3egallen izzayriyen d wazal n 30 inaẓuren ibaraniyen idyussan di spanya, Lalman, telyan, gini,cungu d fransa. Ahil d amerkanti, timsikniyin, isaragen, isura, ticeqqufin n umezgun, timucuha, tamedyazt, ccna, timliliyin, uraren deg yiberdan akked yizenqan. Iswi n tfaska-agi d asnerni d unegmu n yidles amaziɣ akked tfriqt s umata. Ilmend n tfaska n tefriqt panafricain ara-yebdun ussan-a di Lezzayer tamaneɣt, asentel n tfaska-agi d “Tamurt n leqbayel, tiwwura n Tefriqt”. Tafaska Iwennan yes-s ay d-tbedd tejmaεt n taddart n Wizgan anda iḥedren merra yimezdaɣ. Ḥasen Metref aselway n tdukla Inaẓuren n Tizi Wezzu yesefhem-d iswi n tfaska-agi. Dda Mhenni acennay aqdim n radyu n teqbaylit yerra tajmilt i kra n win i d-yusan ɣer tfaska-agi. Anazur Denis Martinez, yerra tajmilt i Mhenni s tezlitt-ines i yetwasnen aṭas (tcekred-iyi-d jeddi-k). Syen Said Ghaoui aqerru n taddart n Wizgan yefka-d awal unsib n bedu n tfaska agi.
Islam Bessaci