Ilmend n unebdu n useggas-a, ssufɣent-d tesquma n tudrin n tɣiwant n Souk Oufella d tɣiwant n Chemini yiwen n ulɣu ideg ssuturent imezdaɣ ad sneqsen deg leklifat n tmeɣriwen. Iεeggalen n tesquma-ya n lεerc n at Weɣlis usammar msefhamen ɣef kra n tneqqiḍin yerzan asenqes di lḥerǧ d userref ɣef tmeɣriwin yecban : zwaǧ,; aεeyyen, agezzum. Aya yella-d mbeεd mi rnan di ssuma waṭas n yisafaren ama d lḥerǧ neɣ d lmakla. S wakka win ur nesεi ara tadrimt yuεer-as ad ten-iqabel. Ilmend n tifrat, sneqsen deg umḍan n yiqeffafen d umḍan n ṭunubilat i d-yettawin tislit. Am wakken daɣen i beddlen asečči n lfaḍur s tissit kan n lqahwa akked lgazuz. Ad nesmekti kan, lqanun yecban wa yeffeɣ-d yakan di temnaḍt-a deg yiseggasen n tesεin maca imezdaɣ ur qudren ara ayen s i d-iwessa. Γef waya tisquma-yi n tudrin ssarament akken imzdaɣ ad qadren asaḍuf-a amaynut.
Mokrane Chikhi