D anebdu ! Ttfarasen yimdanen ad xedmen timeɣriwin uqbel ad d-yaweḍ waggur n Remḍan. Uɣalent tmeɣriwin mačči kan di lexmis d lǧemɛa, maca ula deg wussan-nniḍen. Zgan ččuren yiberdan d tiqufya, takerrust deffir tayeḍ. Awi-d kan imi d lfuruḥ. D acu kan, ayen i d-ijebden lwelha n yal yiwen seg-neɣ,; aṭas seg leɛwayed n tmurt n Leqbayel i yebdan ttruḥunt. S tidet, ilemẓi n tura ur yezmir ara ad yili am win n zik, yella wayen yeǧǧa zzman, lameɛna tizeḍt n lejdud teqqim-d d lamana iɣef ara nḥareb. Cherif Hamani, deg yiwet seg tezlatin-is yesmekta-d azal n ubernus, yewwi-d ula d tarrayt i s-yettwaxdam uzamul-agi n uqbayli. Tura, “Le voile” yuɣal d “La mode”, tin yelsan abernus d tawedrarit ! Uqbel ad nger asurif, ilaq ad nezwer nnif. Qqaren-d yimezwura-nneɣ,; tislit mi ara d-tels abernus, attan deg yiri n urgaz ara iḥarben fell-as. Timɣarin-nneɣ,; d awezɣi ad ffrent abernus, neɣ ad yennefḍas. Yezga iɛelleq di tesga, yessebgan-d lhiba. Ula deg umezruy, d netta i d azamul n Umaziɣ. Di lawan-agi ideg d-negra, ahat aqbayli s anda yebɛed yessuref, s anda yeqreb war yewwiḍ. Wissen kan seksu-nni melmi ara d-yaweḍ lawan-is ad yettwabeddel s “les crevettes”.
M. Smail