Ṭṭalen-d wussan n ssmayem, yid-sen yerna uzɣal, wwḍent tseddarin almi d 40 deg twilayt n Bgayet, d ayen i d-yeglan s txessarin. Azal n 180 ihegtaren n umadaɣ d 30 ihegtaren n yisekla n lfakira i tečča tmes deg 24 tsaɛtin deg ulɣu i d-yeffɣen sɣur srabes n lemḥadra.
Deg yiwen n wass, 24 n yimukan ideg tuɣ tmes. Tiɣiwanin i tḥuza tmes d Tala Ḥamza, Wadɣir, Ifnayen, Ilmaten, Timezrit, Ticci, uzellagen, Sedduq, Dergina, Tizi-n-Berber, Adekkar, Bni Ksila, Amizur d Tinebdar.
Taɣiwant i yenṭerren nezzeh d Tala Ḥamza (wali arrat n Mohand Ait Ighil, Taɣiwant yewwan s tmes). Times tender din ɣef 10 n ssebḥ almi d azekka-nni i tensa. Srabes n lemḥadra sxedmen ttawilat imeqqranen yerna inuda i lemɛiwna sɣur twilayin-nniḍen, tid iqerben ɣer Bgayet. Azal n 10 yikumya n les pompiers imeqqranen i d-yernan ɣer wid n Bgayet akken ad tens tmes.
Times n useggas-a, seg wasmi yebda unebdu, tečča azal n 309 ihegtaren deg-sen yisekla n lfakiya d yiggan, tibelṭin, tisufa, tizantin, amadaɣ,; atg. Ilindi, deg wayyur n yulyu kan, times tečča azal n 256 ihegtaren yeqqlen d iɣiɣden deg twilayt n Bgayet.
Yewwi-d ad nerr tajmilt i yirgazen yeqqublen times n wussan-a. Γas yeḥma mačči d kra, nutni qqimen din almi tensa tmes, almi ur d-yeqqim later-is.
D. I.